The duk of Glouc’ and his wyf the duchesse of Holond wente over the see for take possesscion in hise landes.
This same yere[110]the duke of Gloucestre with his wyf the duchesse of Holand wenten over the see into Henauude, for to taken possession of hys wyfves herytage, where he was worschipfully receyved and taken for chif lord of the lond: but not longe after it happed so that he was fayn to retorne hom ageyn, and lefte hys lady behynde hym with all the tresour that he broughte thedyr, in a town that men callen Mouns in Henauude, the whiche was swore to hym to ben good and trewe, and to kepe the lady in sauf warde tyl he come ageyn: but at the laste they that weren in the forseid town becomen fals, and delyvered that worthy lady to the duke of Burgoyn; and he sent here to Gaunt there to ben kept, but as God wolde for here, withinne a schort tyme thens sche ascaped awey in a mannes wede, and com to a town of hire owne in Seland that is clepyd Sirixe, and fro thens into Holand that is called Tirgowe, where with helpe of here frendes that were there, sche withstood the duke of Burgoyne and al his malyce.The sege of Mauns.Also the same yere the erle of Salysbury, the erle of Suffolk, the lord of Wylughby, and the lord Scales, with there meyne leyden a sege to the citee of Mauns, the whiche citee was yolden up to them withinne schort tyme, with manye othere stronge townes and castells to the nowmbre of xxxvjti.
REX HENRICUS SEXTUS. [1425-1426.]
This same yere, that is for to seye the morwe after seyntSymon day and Jude, the meire rood to Westm’, and took his charge as the custume is of the meires of London. And the same day at even and alle the nyght folwynge was strong and grete wacche:An hevynesse roos betuen the bysshop of Wynchestre and the duke of Gloucestre.and the morwe nest folwynge moche peple of the citee of London in savynge and kepynge the kynges pees, arraied in sufficient harnes to stonde with the duke of Gloucestre protector of Engelond, and be the maire of London, and in defens of the citee ageyn the bysshop of Wynchestre;[111]and the peple that to hym was withholden of the countes of Lancastre and Chestre, and of othere cuntres; but thankyd be God there was non harme don on neythir partye.The kyng was mad knyght.Kyng Herry made manye knyghtes with his owne handes.Also the same yere John duke of Bedford made kyng Herry the vjte, his goodsone, knyght at Leyc’, upon Witsoneday. And anoon forthwith the kyng Herry dobbed alle the knyghtes whos names here folwen, that is for to sey, first, the duke of York, the sone and heire of the duke of Norfolk, the erle of Oxenford, the erle of Westmerland, the sone and heire of the erle of Northumberland, the sone and heire of the erle of Ormond, the lord Roos, Sire James Boteller, the lord Mautravers, Sr. Herry Gray of Tankervyle, Sr. William Nevyle lord of Faucomberge, Sr. George Nevyle lord of Latymer, the lord of Welles, the lord of Berkeley, the sone and heir of the lord Talbot, Sire Raf Grey of Werke, Sire Robert Veer, Sire Richard de Gray, Sire Edmond of Hungerford, Sire Robert ofSegewyk was hanged [in another hand.]Wyngefeld, Sire John Botiller, Sire Reynald Cobham, Sire John Passhelewe, Sire Thomas Tunstall, Sire John Chidiok, Sire Rauf Langeford, Sire William Drury, Sire William ap Thomas, Sire Richard Carbonell, Sire Richard Wodevyll, Sire John Shardelowe, Sire Nicholl Blouket, SireRauf Radclyff, Sire Edmond Trafford, Sire William Cheyne, Sire William Babyngton, Sire John Juyn, and Sire Gilbert Beauchamp.
REX HENRICUS SEXTUS. [1426-1427.]
This same yere aboughte Schroftyd the duke of Bedford wyth his lady passed the see to Caleys: and a litel before passyd the see to Caleys Herry bysshop of Wynchestre;The bysshop of Wynchestre was mad cardynall.and upon oure lady day the Annunciacion anno d’n’i mill’mo ccccmoxxvij, the bysshop of Wynchestre was made cardynall in seynt Marye chirche of Caleys ful solempnely, where were the same time the duke of Bedford regent of Fraunce and his duchesse;The cardynall haat.and before or the masse was begonne whiche the bysshop schulde don, the popes cosyn broughte the cardinall hat and with gret reverence sette it upon the heyghe auter, and there it stood alle the masse tyme; and whanne the bysshop hadde don the masse and was unreversed,Wille Wawe was hanged: the hedes of buttes of suete wyn were smeton out [in another hand.]thanne was don on hym an abyte in manere of a freres cope of fyn scarlet furred with pured; and thanne he there knelynge upon his knees before the heighe auter the popes bulles were reed to hym; and the firste bulle was his charge; and the seconde bulle was that he schulde have and reioyssen alle the benefices sp’uelx ant temperellx that he hath in Engelond; and whanne this was don the regent of Fraunce duke of Bedford,How the hat was seet on his heed.wente up to the heighe auter and tok the cardinall haat and sette it upon the bysshopes heed of Wynchestre, and bowed and obbeyed to the bysshop and tok hym before hym.
A gret reyn and a long duryng.
This same yere[113]fro the begynnyng of April into Halwemasse was so gret abundance of reyn, where thorugh nought only hey was distroied, but also moche corn, for it reyned almost every other day more or lasse.
REX HENRICUS SEXTUS. [1428-1429.]
The erle of Sar’, Sr. Th’ Mountagu, at the sege of Orlyons was sclayn with schot of a gonne.
This same yere,[114]the iij day of Novembre, deyde the worshipfull Sire Thomas de Mountagu erle of Salisbury before Orlyons, thorugh schetyng of a gonne as he lay at the sege before the forseid cite; God have mercy on his sowle. Forthermore duryng that sege, at the begynnyng of Lenten neste folwynge, vii mlof Frensshmen and mo with many a Scot fel upon oure men as they wente thiderward with vitailes be sydes a town that is called Yamvyll, where Sr. John Styward and his brother with mo than vijcScottes that thei were governours of, lighten a fote, and were sclayn every modir sone be Sr. John Fastolf, Sr. Thomas Rempston, and othere capitayns of oure syde, the whiche hadde nought passyng vcfytynge men with them at all withoughte chartres; but Charles of Burbon and the bastard of Orlions, with alle the Frensshmen sittynge on horsbak seynge the governaunce, trussed them and wente away. Also a lytel before Witsonday nest folwynge, was the forsayd sege broken up be the duke of Launson and his power; and alle oure lordes and capitayns of the same sege disparpled, that is to say theerle of Suffolk and his brother, the lord Talbot, and the lord Scales with many mo, the whiche sone after were taken everych on at myschief.The mordryng of a widewe be a fals Breton.Furthermore, this same yere betwen Estren and Witsontyd a fals Breton mordred a wydewe in here bed, the whiche fond hym for almasse withoughte Algate in the subbarbes of London, and bar awey alle that sche hadde, and afterward he toke socour of Holy Chirche at seynt Georges in Suthwerk; but at the laste he tok the crosse and forswore the kynges land; and as he wente hys way it happyd hym to come be the same place where he had don that cursed dede,Here women maden an ende of the Breton.and women of the same paryssh comen out with stones and canell dong, and there maden an ende of hym in the hyghe strete, so that he wente no ferthere notwithstondynge the constables and othere men also, whiche hadde hym undir governaunce to conduyt hym forward, for there was a gret companye of them, and hadde no mercy, no pyte. Also this same yere, the viij day of Novembre, the duke of Norfolk with many a gentilman squyer and yoman, tok his barge at seynt Marye Overeye betwen iiij and v of the belle ayens nyght, and purposyd to passe thorugh London bregge, where the forseid barge thorugh mysgovernaunce of steeryng, fill upon the pyles and overwhelvyd, the whiche was cause of spyllyng of many a gentilman and othere, the more ruthe was, but as God wolde,The duke of Norfolk was in perille at London bregge.the duke hymself and too or iij othere gentylmen seenge that myschief, leped upon the pyles, and so were saved thorugh helpe of them that weren above the brigge, with castyng down of ropes.
REX HENRICUS SEXTUS. [1429-1431.]
The coronacion of oure kyng.
The same yere, upon seynt Leonardes day, the kyng Herry the vjte, noughfully viij yere old, was crowned at Westm’;[115]at whos coronacion was mad xxxv knyghtes; and on Seynt Georges day nest folwynge, afore noon, he passyd over the see to Caleys: also the xxiij day of May, after noon ayens nyght, before the town of Compigne,The pucell de Dieu was take.there was a woman taken armed in the feld, with many othere capitayns, the whiche was calledla pucelle de Dieu, a fals wyche, for thorugh here power the dolphyn and alle oure adversaries trusted holy to have conquered ayen alle Fraunce, and nevere to an had the wers in place that sche hadde ben inne, for they helden here amonges them as for a prophetesse and a worthy goddesse.A wolle pakker a heretike.Also the same yere, aboughte Candelmasse, Richard Hunden, a wolle packer, was dampned as a fals heretyk and a lollard, and brent at the Tour hill, the whiche was of so large consciens that he wolde eten fleysh on Frydays.[116]
Lollard.
This same yere aboughte Mydlenten was Sr. Thomas Baggeley, prest and vyker of Mabenden in Essex, besyde Walden, dysgraded of his presthod and dampned as for an heretyk, and afterward brent in Smythfeld.Lollardes.Also the same yere, in somer, the kyng beynge in Fraunce with alle hise temperall lordes for the most partye, the lollardes, with manye mo othere thatweren enclyned to there secte, casted billes aboughte in every good town in Engelond, and purposed for to have made a rysyng and distroyed Holy Chirche and the reaume; but, thanked be Almyghty God, there falsnesse and there treson was sone aspyed and distroyed; for on William Maundevyll, sum tyme a wever of Abendon, and bailly of the town, that called hymselfJakke Sharp a lollerd was behedyd at Abyndon.Jakke Sharp of Wygemoresland in Walys, and schulde a ben chief mayster of them alle, was taken at Oxenford, and hedyd at the seid toun of Abyndon, on Tuesday in Whitson wyke, with many mo of his felas, and in many mo othere places of the reaume also.
REX HENRICUS SEXTUS. [1431-1433.]
Kyng Herry was crowned kyng of Fraunce.
This same yere, the xvj day of Decembre, G beynge the dominical lettre, kyng Herry the vjtewas crowned kyng of Fraunce at Parys, in the chirche of Notre Dame, with gret solempnyte and rialte; and anoon after he turned ayen into Engelond, and landed at Dovorr the ix day of Feverer’, and come to London the xxj day of the same month, where he was ryally resceyved, alle the craftes rydynge ayens hym all in white.
Soudeors were arest.
This same yere the duke of Bedford regent of Fraunce com to Caleys the Tuesday before Estre day;[118]and in the morwe after the sowdeours were arested and put into warde: and inthe Estre woke the forsaid regent rood into Picardie to Tyrywe,The regent of Fraunce was wedd.Sowdeors of Caleys were banschyd and some ded.and there the bysshop of Tyrewyn dede wedde the regent to the erles doughter of Seynt Poule; and whanne they were weddyd he com to Caleys ageyn: and the xj day of Jun, on seynt Barnabe day, were foure sowdeours of Caleys beheded; that is for to sey, John Maddeley, John Lunday, Thomas Palmere, and Thomas Talbot; and v score and x banshyd that same tyme, and before that tyme were banshyd vj score; and so on Midsomer-even after com the regent and his lady to London, that faire citee.
REX HENRICUS SEXTUS. [1433-1435.]
The Lollardes of Prake were distroyed.
This same yere,[119]aboughte Whitsondtyd, the lollardes of Prage were distroyd, for at too jorneys there were sclayn of them mo thanne xxtimlwith there cheveteynes; that is for to sey, P’copins, Shaphoo, and Lupus, P’sbit; and there also was taken onlyve Maister Piers clerk of Engelond, and an Englyssh heretyk and enemye to all Holy Chirche.A gret frost durynge xj wokes.Also this same yere was a gret frost and a strong, lastynge more than xj wokes, for it dured fro seynt Kateryne even unto seynt Scolastyce day the virgyne, in Feverer.
A trete for pees betuen Engelond and Fraunce.
This same yere[120]in hervest tyme, at the citee of Aras, there was a gret counseill and a strong, to trete for the pees betwen Engelond and Fraunce, of manye a gret lord both sp’uelx andtemperelx, but as it is seyn ofte tyme that undir tretys is treson, so was it there; forThe duk of Burgoyn was swornof whiche oth he was assoyled of a cardynall.the duke of Burgoyne that was sworn upon Godes by sacred, to be good and trewe to the kyng of Engelond and hise successores, there, of a cardinall that was callyd cardinall of Crouche, unwetynge the holy fadyr the pope, was asoyled of that othe to holde with oure adversarye the dolphyn, that hadde mordred his owne fadyr before tyme. Also this same yere the kyng of Aragon, the kyng of Navare, and the Maister of seynt James, with iij c knyghtes and squyers and mo, were taken in the see of Jauneys, upon seynt Domynyk day.
REX HENRICUS SEXTUS. [1435-1436.]
Depe and Harfleu were lost thorugh defaute.
This same yere[121]upon Alle Halwe nyght, was the toun of Depe stole and take with Armynakes: and on newe yeres tyd nest folwynge the toun of Harflieu also, for defaute of good kepynge, the whiche kyng Herry the fyfthe gette before the bataill of Agincourt, with a strong sege and a ryall, first of alle the townes of Normandye.The duke of Burgoyne with a ryall power leyde sege to Caleys:Also this same yere the ix day of Jule, the duke of Burgoyn with a ryal power leyde a sege to the town of Calys, and contynued unto the xxix day of the same monthe; and that day, blessyd be Almighty God, his male writhed, for a strong bastyll that he hadde mad upon the water syde was taken and distroied, and alle that were withinne sclayn unto the noumbre of vcmen oughttake iij persones, that is for to sey, a knyght, a prest, a frere, the whiche knyght seyde that the duke of Burgoyn was nought thre men from hym in thesame bastill that tyme that he was taken;and there they sette there tentes a fyre, and wenten there way, and loste there stuff.and thanne a morwe erly also the oost sette there tentes a fyre, and wente there wey with sorwe, levynge gret stuff behynden them bothe of vitailes and of other thynges also. And the seconde day of August nest folwynge, the duke of Gloucestre, with the duke of Norfolk, the erle of Warrewyk, the erle of Stafford, the erle of Hunt’, the erle of Oxonford, the erle of Devenschire, the erle of Morteyn, and the erle of Uwe, with manye othere lordes, barons, and knyghtes, squyers, and yemen, unto the noumbre of l mland mo, passyd over the see with v hundred seyles and mo, and londed at the forseid toun of Caleys;Oure lordes wenten into Flaundres and distroyed the town of Poperyng, and manye othere townes.The kyng of Scottes leyde sege to the castell of Rokysburgh, and shamfully brak up the sege and wenten away.and the iiij day after, they passyd forth over the water of Gravelynge and comen into Flaundres, where they brenden and sclewe all that they myghte come to xj dayes durynge, in to gret harm of that cuntre, and pryncypally to the toun of Poperynge and of Belle, where Haukyns drank be note withoughte cuppe; and thanne they turned ageyn and comen hom sauf and sounde, blessyd be God of his soude. Also this same yere, the xiij day of August, the kyng of Scottes and hys wyf lyenge at the sege of the castell of Rokysburgh, with a gret power of Scottes and a gret ordinaunce brak up the sege and wente his way shamfully, and lefte his ordinaunce and his stuff behynden hym as a coward, and mo thanne vij score of his galyentires sclayn and taken at the same sege: and so myghte he wel sey, that in the crook of the mone com he thedirward, and in the wylde wanyande wente homward:
REX HENRICUS SEXTUS. [1436-1438.]
Obit’ Katerine Re’ Angl’.A tour with too arches of London bregge fel don.Obit’ Joh’ne regine Angl’.the deth of the lyons.
This yere, the secunde day of Januar, deyde quene Katerine, the whiche was kyng Herry wyf the fyfthe. Also this yere, the xiiij day of Januar, fyl doun a tour of London bregge toward Suthwerk, with too arches and al that stood therupon.[123]Also this same yere, the ix day of Jull, deyde quen Jane kyng Herry the forthe wyf, that before was duchesse of Bretayne. Also this same yere deyde alle the lyons that weren in the Tour of London, the whiche was nought sen in no mannys tyme before out of mynde.
Oweyn brak prison prevyly, which hadde wedded quen Katerine.
This same yere on Oweyn, no man of birthe nother of lyflode, brak out of Neugate ayens nyght at serchynge tyme, thorugh helpe of his prest, and wente his wey hurtynge foule his kepere; but at the laste, blessyd be God, he was taken ayeyn; the whiche Oweyn hadde prevyly wedded the quene Katerine, and hadde iij or iiijorchyldren be here, unwetyng the comoun peple tyl that sche were ded and beryed.Will’m Goodgrom was hangen.Also the same yere on William Goodgrom of London, corsour, for scleynge of a man of court in Hosyere lane be syde Smythfeld, was hangen at Tybourne.
REX HENRICUS SEXTUS. [1438-1439.]
A gret myschief fell at Baynard castell.Another myschief fell at Bedford.
This same yere,[124]upon newe yere day after mete, at Baynard castell fyl a down sodeynly a stak of wode and killed iij or iiijmen myschevesly, withoughten othere mo that were there sore hurt. Also anon after at Bedford, on the schire day, weren xviij men at onys murdred myschevously withoughte any strok, in fallynge doun hedlynge at the stayre of there Shire-hous, and manye mo foule hurt.Obit’ comit’ Warr’.Also the laste day of Aprill, at Roane in Normandye died Sr. Richard Beauchamp erle of Warwyk, there beynge lieutenaunt undir the kyng, on whos soule God have mercy!Knyghtes of the bath.Also the same yere anon after Estre, W. Estfeld of London, mercere, and Lowys John were made knyghtes of the bathe. Also the same yere was the newe cunduyt in Fletstret begonnen to make.A gret derthe of corn.Also this yere was so gret derthe of corn that men were fayn to ete rye bred and barly, the whiche nevere ett non before; and rather thanne fayle, bred mad of benes, peses, and fecches, and wel were hym that might hav ynowe therof; for a bushel of whete was worth iiis.at London, and in sum cuntre derrere; and that mad bakers lordes: but y prey God nevere let us see that day no more yf his wille be.The erle of Hunt’ with a faire meyne wente over the see into Gascoigne.Also in this same yere wente over the see the erle of Huntyngdon with a faire mene into Gascoigne and Gyan, for to defende that land fro the kynges enemyes. Also the same yere wente the duke of Norfolke, the erle of Stafford, the erchebysshop of York, and othere lordes and bysshoppes over the see to Caleys, for to trete for the pees betwen Engelond and Fraunce and betwen Engelond and Flaundres.Robert Chicheley citezein of London deyde.Bawdes were sett on the pillory, and strompettes were led to Neugate.Also the same yere deyde a worthy citezein of London, Robert Chicheley, grocer, that yaf to xxiiij hundred men a gret dyner. Also the same yere in hervest tyme weren too baudes sett on the pillory, and iij strompettes were led to Neugate, and there were put on therehedes ray hodees, and with roddes of a cubitt of lengthe in there handes, and so they were leed be the schirreves officers to the pillory in Cornhull, and there was there charge reed, how they schulde be put out of the franchise of London citee, and no more comyn withinne the walles of the citee, but they comen in with there raye hodees on there hedes upon certeyn peyne. Also the same yere in hervest tyme were brent at the standard in Chepe diverses nettes, cappes, sadelys, and othere chaffare, for they were falsly mad and deseyvably to the peple.
REX HENRICUS SEXTUS. [1439-1440.]
Obit’ comitisse Arundell and Huntyngdon.
This same yere[125]deyde the countesse of Arundell and of Huntyngdon, in Gascoigne. Also this yere were too bargemen hanged in Tempse beyownde seynt Katerines, for scleying of iij Flemynges and a child, beynge in a schip in Tempse of there contre, and weren homward; and there they hengen til the water hadde wasted them be ebbyng and flowyd, so the water bett upon them.Maist’ Richard was brent as a heretike.Also the same yere upon a Fryday, that is for to sey the ijdeday of August, was on Maister Richard Wyche, sum tyme vicary of Depforde in the schire of Kent, brent for lollery at the Tour hill;Lowlars.and there manye of his secte and of his lord wenten and offred at the same place where he was brent, tyl manye of them were aspyed and put in prison; and for doughte that there schulde a ben a maner of arysyng of suyche mysbelevers, the maire, the schirreves, with alle the aldermen, be comown counseill and comown assent, dede ordeyne diverses wacches of diverses wardes of the citee, that a certeyn schuldewacchen a day and as manye a nyght at the same place, unto the tyme that the maire with his counseill wolde sende them discharge. Also this same yere on a Fryday, that is for to seye the xij day of August, aboughte iij of the belle at afternoon, there fill a sodeyn thondyr clap with a gret reyn and a lyghtnynge, theIgnis.whiche lyghtnynge entred in at a wynde and distroyd moche hey which was stuffed in a gret hous at the Sterre in Bredstrete; and the remenaunt of the hey was cast out and had in to Chepe, the quantyte of l cart full: and so, worschepyd be God, there was not moche more harme do, but palbrakyd sore therein and lost the hey.Ignis.Also on Fryday xiiij nyght after that, in the nyghtes tyme was a goldsmyth hous be syde the crosse in Chepe althernest the Egle brent, and al that was therinne; but it were the lesse and a part of the tannere at the Egle, and the good man of the Egle hadde moche harm as it was seyd. Also in this same yere began the parlement at Westm’ at Mighelmesse ant lasted to Cristemasse, and enyorned til after the feste to Redyng in Berkschire, and so it lasted there til Schroftyd, and there endyd;Merchaunts straungers to be oosted with Englisshmen.and at the whiche parlement was ordeyned that all marchauntes strangers schulde gon to oost with Englysshmen withinne too dayes after they be comen into the lond, in what partie of the lond soevery thei be, to selle there marchaundyse, and bye ayen withinne viij monthes after there comynge, and gon ageyn withinne the same terme; and in cas that eny of there marchaundyse leve unsold at there partynge, they to have it with them withoughten eny custom payenge; and the goodes that thei bye and selle shall yeven to there hoost for every xxs., worth, ijd.,except the Estirlynges. Also at the same parlement was graunted that the kynges vitaill schulde be payed; and the town of Caleys for to be made ageyn; and the see for to be kept with the V portus of Engelond; and that every houshold of Duche peple shall paye to the kyng be yere xvjd., and every servaunt of them shall paye vj be yere. And in this yere come pardon into Engelond fro the pope of Rome, undir his lettre and seall of leed, of as moche power as he has, to every prest to assoilen every Cristeman that yevyth a part of his goodes to the sustentacion of the popes werres in strengthynge of the Cristen feith. Also in this yere was cried pees betwen Engelond and Zelond, Holond ant Freselond perpetuell. Also in this same yere was a man drawen and hanged, hedid, and quarterd, and sett up at diverses places, for he tok up bestes and all maner vitaill in the cuntre in the kynges name, and was but a thef, and so robbyd the cuntre with treson.
REX HENRICUS SEXTUS. [1440-1441.]
In this same yere wente the duke of York into Normandye, with the erle of Oxenford, the erle of Ewe, Sire Richard Wodevyle, Sr. Jamys of Ormond, the lord Clynton, and many othere gentiles, with a faire retenewe of peple, and was mad regent of Fraunce for v yere, and he shippyd at Portesmouth in Hamptonshire. In this same yere, the morwe after seynt Katerine day, was a chalange in armes provyd afore the kyng, withinne lystes mad in Smythfeld, betwen Sr. Richard Wodevill, knyght of Engelond, and a knyght of Spayn, whiche knyght for hislady love shulde fyghten in certeyn poynts of armes, that is to seye, with ax, swerd, and daggere; and or thei hadde do with the polax the kyng cried, hoo.[126]Also moreover in the same yere was a fightyng at the Tothill betwen too thefes, a pelour and a defendant, and the pelour hadde the feld and victory of the defendant withinne thre strokes. Also in this yere was the duke of Orlyons delyvered out of preson, and sworn to the kyng and othere certeyn lordes that that tyme were there present, that he shulde nevere beren armes ageyn the corowne of Engelond; and also that he schulde trete for pees betwen bothe reaumes Engelond and Fraunce, and ellys he to comen ayen into Engelond and yelden hym to the kynges grace. And in this yere was wyn, salt, and whete, gret chepe in the parties of Engelond. Also in this same yere the duchesse of Gloucetre was arested and put in Holt, for she was suspecte of treson; and a clerk that was longyng to here, whiche was clepyd Roger Whiche, was taken for werchynge of sorcery ayens the kyng, and he was put into the Tour; and after, he was brought into Poules, and there he stood up on high on a scaffold ageyn Poulys crosse on a Sonday, and there he was arraied like as he schulde never the in his garnementys, and there was honged rounde aboughte hym alle hise intrumentis whiche were taken with hym, and so shewyd among all the peple; and after, he was broughte to fore the lordys, and there he was examyned; and after broughte to the Yeldehalle, and there he was regned aforen the lordes of the kynges counseill and to fore alle the juges of this land;The lady of Gloucestre.and anon after, the lady of Gloucestre afornseid was mad to apere thre sondry dayesafore the kyng and alle hise lordes spiruell and temperell; and there she was examyned of diverses poyntes of wicchecraft, of the whiche she knowleched that she hadde used thorugh the counseill of the Wicche of Eye; the whiche was brent on the even of Symond and Jude in Smythefeld.
REX HENRICUS SEXTUS. [1441-1442.]
In this yere[127]my lady of Gloucestre hadde confessyd here wichecraft, as it is afornseid she was yoyned be alle the spriualte assent to penaunce; to comen to London fro Westm’ on the Moneday next suynge and londe at the Temple brigge out of here barge, and there[128]she tok a taper of wax of ijlbin here hond, and wente so thorugh Fletstrete on here foot and hoodles unto Poules, and there she offred up here taper at the high auter; and on the Wednesday nest suenge she com fro Westm’, be barge, unto the Swan in Tempse strete, and there she londyd, and wente forthe on here feet thorugh Brigge strete, Groschirche strete, to the Ledenhalle, and so to Crichirche in the wyse afornseyd; and on Fryday she londed at Quen hithe, and so forth she wente into Chepe, and so to seynt Mighell in Cornhull, in the forme afornseid; and at iche of the tymes the mair with the schirreves and the craftes of London were redy at the places there she sholde londe: and after, Roger the clerk afornseyd on the Satirday, that is to sey the xviij day of Novembre, was brought to the Yeldehalle, with Sire John Hom prest, and William Wodham squyer, thewhiche Sr. John and William hadden there chartres at that tyme; and the clerk was dampned, and the same day was drawe fro the Tour of London to Tiborn, and there hanged, hedyd, and quartered, and the heed sett upon London bregge; and his oo quarter at Hereford, another at Oxenford, another at York, and the fourthe at Cambregge; and the lady put in prison, and after sent to Chestre, there to byde whill she lyvyth. Also the same yere was a parlement, and it began at Cristemas and lasted til Estre; at the whiche parlement was ordeyned that the see schulde ben kept half a yere at the kynges coost, and therfore to paye an holl fyftene, and London to lene hym iij mllib’. And that yere, the laste day of —— save on, there was a batayle in Smythfeld, withinne lystes, aforn the kyng, betwen the lord Beaufe a Arrogonere, and John Ashele squyer of the kynges hous, a chalange for spere to caste pollex and dagger at the lord aforeseyd in brekynge of his gauntelette and reysyng of his umbrary, and hadde hym at myschief redy to a popped hym in the face with his dagger, tyl the kyng cried hoo: and there the seid Asshle was mad knyght in the feld.[129]Talbot was made erle of Shrewesbery.Gascoyn and Gyan loste.Also in this same yere come the lord Talbot out of Fraunce and was mad erle of Schrovesbury, and wente over into Fraunce ayen with iij mlmen. And in this yere come tidynges unto the kyng that Gascoigne and Gyan was lost, save Burdeux and Bayon, be the Armynakes take: in the mene tyme ambassatours of the same partye of Armynackes were come unto the kyng to entrete for a mariage of the erle of Armynakes doughter to be weddyd to the kyng; but because of the same treson the seid mariage was daisshyd. Also this same yere wente a werre in foure parties of Engelond, of every coostxxiiij schippes a werre. And in that same yere com hom out of Fraunce the erle of Ewe and Sr. James of Urmond into Engelond.
REX HENRICUS SEXTUS. [1442-1443.]
In this same yere the erle of Schrovesbery leide a sege bothe be water and be lande to Depe, and kepte it awhile til he ferde so foule with hys men that they wolde no lenger abyde with hym; and so he was fayn to hye hym thens to Roane, and so brake sege. Also in this yere the citezeins of the citee of Norwich aresyn ayens the priour of Crichyrche of the same citee, for certeyn newe customes and bondschipes that he wolde have begonne to have reysyd of the seid citee of alle the comons therinne: wherfore the comons aroos, and wolde a fryred and sautyd the priory and have distroid the prior of the place into the tyme they hadde the fals contryved evidens that weren sealed be old tyme with the comoun seall unwetynge of them, but thorugh a priour of old, and certeyn false aldermen of the same citee, that now arn dede; and the comowns kepte with strong hond the town ayens the duke of Norfolk and alle his pissounz, that wolde a comen thider for the cause afornseid. Wherfore the kyng sente thider the chief juste John Fortescu, the erle of Stafford, and the erle of Huntyngdon, and seten there in sessyons, at the whiche were manye of the citee endyted, and the priour also; and also the citee loste there libertes and fraunchises and fredoms that they hadde afore, and allthe citee cesed into the kynges hand; and a knyght callyd Sr. John Clyfton mad capytayn therof: and manye of the worthy men there of the citee ben fled into othere cuntres over the see, for drede, with as moche of there goodes as they myghte have with them, and lefte there faire places stonde stille.Sr. William Bonevylle went to Burdeux.Also in this yere wente Sr. William Bonevylle, knyght, to Burdeux with viij c of goode fytynge men, to kepe the town unto the tvme a grett retenewe myght be mad and sent thider. Also in this yere deide Henry Chicheley erchebisshop of Caunterbury, in the Passion weke, and is beryed in Caunterbury; and for hym was the bisshop of Bathe, magister John Stafford chaunceler of Engelond, stalled erchebisshop of Caunterbury. And in this yere wente over the see the erle of Somerset with x mlof goode men; and he hadde over with hym gret ordinance of gonnes, brigges, scalyng laddres, and manye mo othere thinges whom J’hu spede for his mercy. And in this yere com over from Normandye the cardinall erchebisshop of Roon, chaunceler of Normandye and bysshop of Ely into Engelond, with the erle of Schrovesbury that was the lord Talbot, and my lord Facombregg, with the Tresore of Normandye and manye othere. And in this yere was lost a good town in Normandye of the lord Scales, that is called there Graundevyle, in the coost of Baas Normandye, toward the coost of Bretaigne, wyth his bastard sone therinne; and the substaunce of alle the good that the lord Scales hadde in that land was thereinne, the whiche was falsly sold be a man that he trusted most too whiles he was at Roon. Also in this yere was gret losse of shippes in the narwe see on oure party, be enemyes of Depe, Boloigne, and Bretayne. Also in thissame yere was cryed that alle men that wolde aventur ony corn or vitaill to Burdeux or to Bayon, or to ony othere place of that cost on oure party, schulde gon custom fre; whiche caused moche corn and vitaill to be shipped thider. Also in this yere was a mad woman pressyd to the deth, for sche hadde spoken ungoodly and to presomptuosly unto oure liege lord the kyng at the Blak heth; and whanne she was brought aforn the juge she wolde not speke a word, for the which obstinacye she was put to the deth as y have rehersyd beforn. Also this same yere deide the bisshop Tirvyn bisshop of Ely, the —— day of Septembre, and lyth....
[Here the Chronicle in the Harleian MS. terminates: the following continuation is copied from the Cottonian MS. Julius B. I.]
[Here the Chronicle in the Harleian MS. terminates: the following continuation is copied from the Cottonian MS. Julius B. I.]
REX HENRICUS SEXTUS. [1443-1444.]
This yere came the duke of Somerset out of Fraunce into Engelond, that had lost many of his men: and that yere the erle of Suffolk, the privey seall, Sir Robert Rose, and the kyngs secretarie went in ambassade into Fraunce to trete for peas; an peas was made for xviij monethes; and the suerte hadde of the maiden for mariage afore record of alle the rial of Fraunce, in presence of our ambassades: and so comen ageyne into England presentyng unto the kyng thes tithings, for the which in alle England and Fraunce was made grete solempnite andioie. And this yere deide the duke of Somerset, on whose soule God have mercy. And that yere was ordeyned thurgh England that no market shuld be more upon the Sonday.Creacion Ao. xxij R’ H. vjti.And in that yere the erle of Stafford was made duke of Bukkyngham, the erle of Dorset markes of Dorset, the erle of Suffolk markes of Suffolke, and the erle of Warwike duke of Warwike.
REX HENRICUS SEXTUS. [1444-1446.]
This yere came quene Margret into England with grete roialte of the kyngs oost, and was receyved at London the xxviij day of May in the moost goodly wise, with alle the citezeins on horsebak ridyng ayenst hir to the Blak heth in blew gownes and rede hodes; and in the cite in diverse places goodly sights ayenst hir comyng: and on the xxx day of May, that was Sonday, sche was crowned at Westm’, and iij daies after open justs for alle that wolde come. And this yere the priour of Kilmayne in Irland appeelid the erle of Ormond. And this yere came certen ambassadours out of Fraunce, undre saf condit, to treat for peas general to be hadde, which accordid not but for xij monthes after the xviij monthes afore writen, and so went home ayen. And this yere was the translacion of Seint Edwarde made holy day in alle London. Also in this yere Paulis steple was set a fire with lyghtnyng.
REX HENRICUS SEXTUS. [1445-1449.]
This yere was the parliament of Bury set, for the good duk of Gloucestre, with grete treason prively wrought ayenst his comyng thider, and was logid in the hospitale, for whom was reised iijxxmlmen; and as he sate at his souper, lordes of diverse degrees came to hym in the kings name, dischargyng hym of the kyngs presence and of alle other maner answeres; and so thei arestid hym of high treason, which he mekely obeied; and his men were voided from him ful hevyly departyng; and after he deceased, the certente howe God knowes: and than was the parliament fynisshed and done. Also this yere was the bataile betwene the Armurer and his man.
In this yere was an heretike brent at the Tour Hill upon Hokmonday. Also this yere were grete flodes, which drowned Stebenhith marshe, Rayneham, and other lowe places. And this yere a quarter of whete fil fro the price of ixs.to iiijs.
REX HENRICUS SEXTUS. [1448-1450.]