Iwish somebody would leave me some money,” said Jinnet, “and the first thing I would dae wi’t would be to buy ye a new topcoat. That yin’s Erchie gettin’ gey shabby, and that glazed I can almaist see my face in the back o’t.”
“Then ye’re weel aff,” said Erchie, “for there’s seldom ye’ll see a bonnier yin in a better lookin’-gless.”
“Oh, ye auld haver!” cried Jinnet, pushing him. “I wonder ye divna think shame to be talkin’ like a laddie to his first lass; and me jist a done auld body! If I could jist get a shape I wad buy a remnant and mak’ ye a topcoat mysel’. I could dae’t quite easy.”
“I ken fine that,” said her husband, “but I’ll bate ye would put the buttons on the wrang side, the way ye did wi’ yon waistcoat. It’s a droll thing aboot weemen’s claes that they aye hae their buttons on caurey-handed. It jist lets ye see their contrariness.”
“Oh! it’s a peety ye mairried me,” said Jinnet; “a contrairy wife must be an awfu’ handfu’.”
“Weel, so ye are contrairy,” said Erchie firmly.
“It tak’s twa to be contrairy, jist the same wye as it tak’s twa to mak’ a quarrel,” said Jinnet, picking some fluff off his sleeve. “Whit wye am I contrairy I would like to ken?”
“If ye werena contrairy, ye would be thinkin’ o’ buyin’ something for yersel’ instead o’ a topcoat for me, and ye’re far mair needn’t,” said Erchie, and with that a knock came to the door.
“There’s somebody,” said Jinnet hastily, “put on the kettle.”
“Come awa’ in, Mr Duffy, and you, Mrs Duffy,” said Jinnet; “we’re rale gled to see ye, Erchie and me. I was jist puttin’ on the kettle to mak’ a drap tea.”
Duffy and his wife came into the cosy light and warmth of the kitchen, and sat down. There was an elation in the coalman’s eye that could not be concealed.
“My jove! I’ve news for ye the nicht,” said he, taking out his pipe and lighting it.
“If it’s that the bag o’ coals is up anither bawbee,” said Erchie, “there’s nae hurry for’t. It’s no’ awfu’ new news that onywye.”
“Ye needna be aye castin’ up my tred to me,” protested Duffy. “Whaur would ye be wantin’ coals?”
“Mr MacPherson’s quite richt,” said Mrs Duffy; “everybody kens it’s no’ an awfu’ genteel thing sellin’ coals, they’re that—that black. I’m aye at him, Mrs MacPherson, to gie up the ree and the lorries and start a eatin’-house. I could bake and cook for’t fine. Noo that this money’s com’ in’ to us, we could dae’t quite easy. Look at the profit’ aff mulk itsel’!”
“Dear me! hae ye come into a fortune?” cried Jinnet eagerly. “Isn’t that droll? I was jist sayin’ to Erchie that I, wisht somebody would leave me something and I would buy him a new topcoat.”
“That’ll be a’ richt,” said Duffy. “If he’ll gie me a haund wi’ this thing I called aboot the nicht, I’ll stand him the finest topcoat in Gleska, if it costs a pound.”
“If it’s ca’in on lawyers and the like o’ that ye want me to dae,” said Erchie, “I’m nae use to ye. I’ve a fine wye wi’ me for ministers and the like o’ that, that’s no’ aye wantin’ to get the better o’ ye, but lawyers is different. I yince went to a lawyer that was a member in oor kirk to ask him if he didna think it was time for him to pay his sate-rents. He said he would think it ower, and a week efter that he sent me an account for six- and-eightpence for consultation. But I’m prood to hear ye’ve come in for something, Duffy, whether I get a topcoat or no’. I never kent ye had ony rich freen’s at a’. Faith, ye’re weel aff; look at me, I havena a rich freen’ in the warld except—except Jinnet.”
“Oh, I never kent she was that weel aff,” cried Mrs Duffy.
“Is it her!” said Erchie. “She has that much money in the bank that the bank clerks touch their hats to her in the street if she has on her Sunday claes. But that wasna whit I was thinkin’ o’; there’s ither kinds o’ riches besides the sort they keep in banks.”
“Never mind him, he’s an auld fuiter,” said Jinnet, spreading a tablecloth on the table and preparing for the tea. “I’m shair I’m gled to hear o’ your good luck. It doesna dae to build oorsel’s up on money, for money’s no everything, as the pickpocket said when he took the watch as weel; but we’re a’ quite ready to thole’t. Ye’ll be plannin’ whit ye’ll dae wi’t, Mrs Duffy?”
“First and foremost we’re gaun to get rid o’ the ree, at onyrate,” said Mrs Duffy emphatically. “Then we’re gaun to get a piano.”
“Can ye play?” asked Erchie.
“No,” admitted Mrs Duffy, “but there’s nae need tae play sae lang’s ye can get a vinolia to play for ye. I think we’ll flit at the term to yin o’ yon hooses roond the corner, wi’ the tiled closes, and maybe keep a wee servant lassie. I’m that nervous at havin’ to rise for the mulk in the mornin’. No’ an awfu’ big servant wi’ keps and aiprons, ye understaund, but yin I could train into the thing. I’m no’ for nane o’ your late dinners, I jist like to tak’ something in my hand for my supper.”
“Och ay, ye’ll can easy get a wee no’ awfu’ strong yin frae the country, chape,” said Erchie.
“Ye must tak’ care o’ yer ain health, Mrs Duffy, and if ye’re nervous, risin’ in the mornin’ to tak’ in the mulk’s no’ for ye. But my! ye’ll no’ be for speakin’ to the like o’ us when ye come into your fortune.”
“It’s no’ exactly whit ye wad ca’ a fortune,” Duffy explained, as they drew in their chairs to the table. “But it’s a heap o’ money to get a’ at yince withoot daein’ onything for’t.”
“Will ye hae to gang into mournin’s for the body that left it?” Jinnet asked Mrs Duffy. “I ken a puir weedow wumman that would come to the hoose to sew for ye.”
“Ye’re aff it a’thegither,” said Duffy. “It’s naebody that left it to us—it’s a medallion. Whit I wanted to ask ye, Erchie, is this—whit’s a medallion?”
“Jist a kind o’ a medal,” said Erchie.
“My jove!” said Duffy, “the wife was richt efter a’. I thocht it was something for playin’ on, like a melodian. Weel, it doesna maitter, ye’ve heard o’ the hidden treasure the newspapers’s puttin’ here and there roond the country? I ken where yin o’ them’s hidden. At least I ken where there’s a medallion.”
“Oh, hoo nice!” said Jinnet. “It’s awfu’ smert o’ ye, Mr Duffy. I was just readin’ aboot them, and was jist hopin’ some puir body wad get them.”
“No’ that poor naither!” said Mrs Duffy, with a little warmth.
“Na, na, I wasna sayin’——I didna mean ony hairm,” said poor Jinnet. “Streetch yer hand, and tak’ a bit cake. That’s a rale nice brooch ye hae gotten.”
Erchie looked at Duffy dubiously. For a moment he feared the coalman might be trying on some elaborate new kind of joke, but the complacency of his face put it out of the question.
“Then my advice to you, Duffy, if ye ken where the medallion is,” said Erchie, “is to gang and howk it up at yince, or somebody’ll be there afore ye. I warrant it’ll no’ get time to tak’ root if it’s within a penny ride on the Gleska skoosh cars. There’s thoosands o’ people oot wi’ lanterns at this very meenute scrapin’ dirt in the hunt for that medallion. Hoo do ye ken whaur it is if ye havena seen it?”
“It’s there richt enough,” said Mrs Duffy; “it’s in the paper, and we’re gaun to gie up the ree; my mind’s made up on that. I hope ye’ll come and see us sometime in our new hoose—house.”
“It says in the paper,” said Duffy, “that the medallion’s up a street that has a public-hoose at each end o’t, and a wee pawn in the middle, roond the corner o’ anither street, where ye can see twa laundries at yince, and a sign ower yin o’ them that puts ye in mind o’ the battle o’ Waterloo, then in a parteecular place twenty yairds to the richt o’ a pend-close wi’ a barrow in’t.”
Erchie laughed. “Wi’ a barrow in’t?” said he. “They micht as weel hae said wi’ a polisman in’t; barrows is like bobbies—if ye think ye’ll get them where ye want them ye’re up a close yersel’. And whit’s the parteecular place, Duffy?”
Duffy leaned forward and whispered mysteriously, “My coal-ree.”
“But we’re gaun to gie’t up,” explained his wife. “Oh, ay, we’re gaun to give the ree up. Ye hae no idea whaur—where—I could get a smert wee lassie that would not eat awfu’ much, Mrs MacPherson?”
“I measured it a’ aff,” Duffy went on. “It’s oor street richt enough; the pubs is there——”
“——-I could bate ye they are,” said Erchie.
“If they werena there it wad be a miracle.”
“——-and the laundries is there. ‘Colin Campbell’ over yin o’ them, him that bate Bonypart, ye ken, and twenty yairds frae the pend-close is richt under twenty ton o’ coal I put in last week. It’s no’ M’Callum’s wid-yaird; it’s my ree.”
“My papa was the sole proprietor of a large wid-yaird,” irrelevantly remarked Mrs Duffy; who was getting more and more Englified as the details of the prospective fortune came put.
“Was he, indeed,” said Jinnet. “That was nice!”
“Noo, whit I wanted you to dae for me,” Duffy went on, “was to come awa’ doon wi’ me the nicht and gie’s a hand to shift thae coals. I daurna ask ony o’ my men to come, for they wad claim halfers.”
Erchie toyed with a teaspoon and looked at the coalman, half in pity, half with amusement.
“Man, ye’re a rale divert,” said he at last. “Do ye think the newspapers would be at the bother o’ puttin’ their medallion under twenty ton o’ coal in your coal-ree, or ony body else’s? Na, na, they can mak’ their money easier nor that. If ye tak’, my advice, ye’ll put a penny on the bag o’ coal and gie short wecht, and ye’ll mak’ your fortune far shairer than lookin’ under’t for medallions.”’
“Then ye’re no’ game to gie’s a hand?” said Duffy, starting another cookie. “See’s the sugar.”
“Not me!” said Erchie promptly. “I’ve a flet fit and a warm hert, but I’m no’ a’thegither a born idiot to howk coal for medallions that’s no’ there.”
Next day Duffy came up with two bags of coals which Jinnet had ordered.
“Did ye find the medallion?” she asked him.
“I didna need to look for’t,” he replied. “I heard efter I left here last nicht that a man found it in a back-coort in the Garscube Road. Them sort of dydoes should be put doon by the polis.”
“Oh, whit a peety!” said Jinnet. “And hoo’s the mistress the day?”
“She’s fine,” said Duffy. “She’s ca’in’ me Jimmy again; it was naething but Mr Duffy wi’ her as lang’s she thocht we were to get rid o’ the ree.”
On the night of the last Trades House dinner I walked home with Erchie when his work was done. It was the 13th of February. There are little oil-and-colour shops in New City Road, where at that season the windows become literary and artistic, and display mock valentines. One of these windows caught my old friend’s eye, and he stopped to look in.
“My!” he said, “time flies! It was only yesterday we had the last o’ oor Ne’erday currant-bun, and here’s the valenteens! That minds me I maun buy——-” He stopped and looked at me, a little embarrassed.
I could only look inquiry back at him.
“Ye’ll think I’m droll,” said he, “but it just cam’ in my heid to buy a valenteen. To-morrow’s Jinnet’s birthday, and it wad be a rale divert to send her ladyship yin and tak’ a kind o; rise oot o’ her. Come and gie’s a hand to pick a nice yin.”
I went into the oil-and-colour shop, but, alas! for the ancient lover, he found there that the day of sentiment was done so far as the 14th of February was concerned. .
“Hae ye ony nice valenteens?” he asked a boy behind the counter.
“Is’t a comic ye mean?” asked the boy, apparently not much amazed at so strange an application from an elderly gentleman.
“A comic!” said my friend in disdain. “Dae I look like the kind o’ chap that sends mock valenteens? If ye gie me ony o’ your chat I’ll tell yer mither, ye wee—ye wee rascal! Ye’ll be asking me next if I want a mooth harmonium. Dae ye think I’m angry wi’ the cook in some hoose roond in-the terraces because she’s-chief wi’ the letter-carrier? I’ll comic ye!”
“Weel, it’s only comics we hae,” said the youthful shopkeeper; “the only ither kind we hae’s Christmas cairds, and I think we’re oot o’ them.”
He was a business-like boy,—he flung a pile of the mock valentines on the counter before us.
Erchie turned them over with contemptuous fingers. “It’s a gey droll age we live in,” said he to me. “We’re far ower funny, though ye wadna think it to see us. I have a great respect for valenteens, for if it wasna for a valenteen there maybe wadna hae been ony Jinnet—at least in my hoose. I wad gie a shillin’ for a rale auld-fashioned valenteen that gaed oot and in like a concertina, wi’ lace roond aboot it, and a smell o’ scent aff it, and twa silver herts on’t skewered through the middle the same as it was for brandering. Ye havena seen mony o’ that kind, laddie? Na, I daursay no’; they were oot afore your time, though I thocht ye micht hae some in the back-shop. They were the go when we werena nearly sae smert as we are nooadays. I’m gled I havena to start the coortin’ again.”
He came on one of the garish sheets that was less vulgar than the others, with the picture of a young lady under an umbrella, and a verse of not unkindly doggerel.
“That’ll hae to dae,” said he, “although it’s onything but fancy.”
“I hope,” said I dubiously, “that Mrs Mac-Pherson will appreciate it.”
“She’s the very yin that will,” he assured me as he put it in his pocket. “She’s like mysel’; she canna play the piano, but she has better gifts,—she has the fear o’ God and a sense o’ humour. You come up the morn’s nicht at eight, afore the post comes, and ye’ll see the ploy when she gets her valenteen. I’ll be slippin’ oot and postin’t in the forenoon. Though a young lassie canna get her valenteens ower early in the mornin’, a mairried wife’s’ll dae very weel efter her wark’s done for the day.”
“It’s yersel’?” said Mrs MacPherson when I went to her door. “Come awa’ in. I kent there was a stranger comin’,—though indeed I wadna be ca’in’ you a stranger,—for there was a stranger on the ribs o’ the grate this mornin’, and a knife fell aff the table when we were at oor tea.”
“Ay, and hoo knocked it aff deeliberate?” interposed her husband, rising to welcome me. “Oh, she’s the sly yin. She’s that fond to see folk come aboot the hoose she whiles knocks a knife aff the table to see if it’ll bring them.”
“Oh, Erchie MacPherson!” cried his wife.
“I’m no blamin’ ye,” he went on; “I ken I’m gey dreich company for onybody. I havena a heid for mindin’ ony scandal aboot the folk we ken, and I canna understaund politics noo that Gledstone’s no’ to the fore, and I danna sing, or play a tune on ony thing.”
“Listen to him!” cried Jinnet. “Isn’t he the awfu’ man? Did ye ever hear the like o’ him for nonsense?”
The kettle was on the fire: I knew from experience that it had been put there when my knock came to the door, for so the good lady’s hospitality always manifested itself, so that her kettle was off and on the fire a score of times a-day, ready to be brought to the boil if it was a visitor who knocked, and not a beggar or a pedlar of pipeclay.
“Tak’ a watter biscuit,” Jinnet pressed me as we sat at the table; “they’re awfu’ nice wi’ saut butter.”
“Hae ye nae syrup to put on them?” asked her husband with a sly glance.
“Nane o’ yer nonsense,” she exclaimed, and attempted a diversion in the conversation, but Erchie plainly had a joke to retail.
“I’ll tell ye a bawr aboot watter biscuits and syrup,” said he. “When I was coortin’ my first lass I wasna mair nor nineteen years o’ age, and jist a thin peely-wally callant, mair like playin’ moshy at the bools than rinnin’ efter lassies. The lassie’s faither and mither jist made fun o’ us, and when I wad be gaun up to her hoose, lettin’ on it was her brither I wanted to see, they used to affront me afore their dochter wi’ speakin’ aboot the Sunday-School and the Band o’ Hope I belanged to (because the lassie belanged to them tae), and askin’ me if I was fond o’ sugar to my parridge, and when I was thinkin’ o’ startin’ the shavin’. I didna like it, but I jist had to put up wi’t. But the worst blow ever I got frae them was yince when I gaed up wi’ a new pair o’ lavender breeks, and the lassie’s mither, for the fun o’ the thing, asked me if I wad hae a piece and jeely. I tellt her I wasna heedin’, that I was jist efter haein’ my tea; but she went and spread syrup on a watter biscuit and handed it to me the same as if I was a wee lauddie wi’ a grauvit on.”
Jinnet laughed softly at the picture.
“Oh, ye may lauch,” said her husband. “There was nae lauchin’ in my heid, I’m tellin’ ye. For there was the syrup comin’ dreepin’ through the holes in the watter biscuit, so that I had to haud the biscuit up every noo and then and lick in below’t so as to keep the syrup frae gaun on my braw lavender breeks. A bonny object for a lass to look at, and it was jist to mak’ me look reediculous her mither did it. She thocht I was faur ower young to be comin’ efter her dochter.”
“So ye were,” said Jinnet. “I’m shair ye hadna muckle sense at the time, or it wadna be yon yin ye went coortin’.”
“Maybe no’; but I never rued it,” said Erchie.
“She was as glaikit as yersel’,” said Jinnet.
“She was the cleverest, lass in the place,” protested Erchie. “My! the things she could sew, and crochet, and mak’ doon, and bake!”
“Her sister Phemie was faur cleverer than she was,” said Jinnet. “She couldna haud a candle to her sister Phemie in tambourin’ or in ginger-breid.”
“And dancin’! She could dance on a cobweb and no’ put a toe through’t.”
“Ye’ll need a line wi’ that yin, Erchie,” said his wife, who did not seem remarkably jealous of this first love.
“Ye should hear her singin’———”
“She wad hae been far better mendin’ her wee brither’s stockin’s, and no’ leavin’ her mither to dae’t,” said Jinnet. “She was a gey licht-heided yin.”
Erchie seemed merciless in his reminiscence,—I really felt sorry for his wife.
“Ye may say whit ye like to run her doon, but ye canna deny her looks.”.
“Her looks dinna concern me,” said Jinnet abruptly. “Ye’re jist an auld haver; think shame o’ yersel’!”
“Ye ken ye canna deny’t,” he went on. “It was alooed all over the place she was the belle. I wasna the only yin that was efter her wi’ my lavender breeks. She kept the Band o’ Hope for nearly twa years frae burstin’ up.”
“I’ll no’ listen to anither word,” protested Jinnet, now in obvious vexation; and mercifully there came a rapping at the door.
She returned to the kitchen with an envelope and a little parcel. Erchie winked at me, hugging to himself a great delight.
“I wonder wha in the world can be writin’ to me,” said she, looking at the addresses.
“It’ll likely be an accoont for di’mond tararas or dressmaking,” said Erchie. “Oh you weemen! Ye’re a perfect ruination. But if I was you I wad open them and see.”
She opened the envelope first. It was Erchie’s valentine, and she knew it, for when she read the verse she shook her head at him laughingly, and a little ashamed. “When will ye be wise?” said she.
Then she opened the little parcel: it contained a trivial birthday gift from an anonymous friend in whose confidence only I, of all the three in the room, happened to be. Vainly they speculated about his identity without suspecting me; but I noticed that it was on her valentine Jinnet set most value. She held it long in her hand, thinking, and was about to put it into a chest of drawers without letting me see it.
“Ye needna be hidin’ it,” said her husband then. “He saw it already. Faith! he helped me to pick it.”
“I’m fair affronted,” she exclaimed, reddening at this exposure. “You and your valenteens!”
“There’s naething wrang wi’ valenteens,” said her husband. “If it wasna for a valenteen I wad never hae got ye. I could never say to your face but that I liked ye; but the valenteen had a word that’s far mair brazen than ‘like,’ ye mind.”
“Oh, Erchie!” I cried, “you must have been blate in these days. The word was——”
He put up his hand in alarm and stopped me. “Wheesht!” said he. “It’s a word that need never be mentioned here where we’re a’ three Scotch!”
“But what came over the first lass, Erchie?” I asked, determined to have the end of that romance.
He looked across at his wife and smiled. “She’s there hersel’,” said he, “and ye better ask her.”
“What! Jinnet?” I cried, amazed at my own obtuseness.
“Jinnet of course,” said he. “Wha else wad it be if it wasna Jinnet? She’s the Rale Oreeginal.”
Whaur are ye gaun the day?” said Erchie to Duffy on Saturday afternoon when he came on the worthy coalman standing at his own close-mouth, looking up and down the street with the hesitation of a man who deliberates how he is to make the most of his Saturday half-holiday.
“I was jist switherin’,” said Duffy. “Since I got mairried and stopped gaun to the Mull o’ Kintyre Vaults, there’s no’ much choice for a chap. I micht as weel be leevin’ in the country for a’ the life I see.”
“Man, aye!” said Erchie, “that’s the warst o’ Gleska; there’s nae life in’t—naethin’ daein’. Ye should try yer hand at takin’ oot the wife for a walk, jist for the novelty o’ the thing.”
“Catch me!” said Duffy. “She wad see ower mony things in the shop windows she was needin’. I was jist wonderin’ whether I wad buy a ‘Weekly Mail’ or gang to the fitba’ match at Parkheid.”
Erchie looked pityingly at him. “A fitba’ match!” said he. “Whit’s the use o’ gaun to a fitba’ match when ye can see a’ aboot it in the late edeetion? Forbye, a fitba’ match doesna improve the mind; it’s only sport. I’ll tell ye whit I’ll dae wi’ ye if ye’re game. I’ll tak’ ye to the Art Institute; the minister gied me twa tickets. Awa’ and put on your collar and I’ll wait here on ye.”
“Do ye need a collar for the gallery?” asked Duffy, who thought the Art Institute was a music-hall. On this point Erchie set him right, and ten minutes later, with a collar whose rough edges rasped his neck and made him unhappy, he was on his way to Sauchiehall Street.
The band was playing a waltz tune as they entered the Institute.
“Mind, I’m no’ on for ony dancin’,” Duffy explained. “I canna be bothered dancin’.”
“There’s naebody gaun to ask ye to dance,” said Erchie. “Do you think there couldna be a baun’ playin’ withoot dancin’? It’s jist here to cod a lot o’ folk into the notion that they can be cheery enough in a place o’ the kind in spite o’ the pictures. And ye can get aifternoon tea here, too.”
“I could be daein’ wi’ a gless o’ beer,” said Duffy.
“No. They’re no’ that length yet,” Erchie explained. “There’s only the tea. The mair determined lovers o’ the Fine Arts can dae the hale show in an aifternoon noo wi’ the help o’ a cup o’ tea, so that they needna come back again. It’s a great savin’. They used to hae to gang hame for their tea afore, and whiles they never got back. The Institute wasna popular in thae days; it was that quate and secluded that if a chap had done onything wrang and the detectives were efter him he took a season ticket, and spent a’ his days here. Noo, ye can see for yersel’ the place is gaun like an inn. That’s the effect o’ the baun’ and the aifternoon tea. If they added a baby incubator to the attractions the same’s they hae in the East-End Exhibeetion, they would need the Fire Brigade wi’ a hose to keep the croods oot. Ye hae nae idea o’ the fascination Art has for the people o’ Gleska if they’re no’ driven to’t.”
“My jove!” exclaimed Duffy, at the sight of the first gallery. “Whit a lot o’ pictures! There’ll be a pile o’ money in a place o’ this kind. Hiv they no water-shoot, or a shootin’ jungle, or onything lively like that?”
0179m
“Man, ye’re awfu’ common, whiles, Duffy,” said Erchie. “I’m fear’t I wasted my ticket on ye. This is no’ an ordinary show for haein’ fun at; it’s for enlargin’ the mind, openin’ the e’en to the beauties o’ nature, and sellin’ pictures.”
“Are they a’ for sale?” asked Duffy, looking with great intentness at a foggy impression by Sidaner, the French artist.
“No’ the hale o’ them; there’s some on lend.”
“I could hae lent them a topper,” said Duffy,—“faur aheid o’ onything here. It’s a drawin’ o’ a horse I yince had in my first lorry; it was pented for me by a penter that lodged above us, and had a great name for signboards. It cost me nearly a pound wan wye or anither, though I provided the pent mysel’.”
“Ay, Art’s a costly thing,” said Erchie. “Ye’ll seldom get a good picture under a pound. It’s no’ athegither the pent, it’s the layin’ o’t on by hand.”
“This yin’s done by hand onywye,” said Duffy, pointing to the foggy impression by Sidaner. “It’s awfu’ like as if somebody had done it themsel’s in their spare time.”
“You and me’s no’ judges o’ that sort o’ thing,” said Erchie. “Maybe it’s no’ near so bad as it looks.”
“Ye see,” Erchie went on, “Art pentin’s a tred by itsel’. There used to be hardly ony picture-penters in Gleska; it was a’ shipbuildin’ and calanderin’, whitever that is, and chemical works that needed big lums. When a Gleska man did a guid stroke o’ business on the Stock Exchange, or had money left him in thae days, and his wife wanted a present, he had his photy-graph ta’en big size, ile-coloured by hand. It was gey like him, the photygraph, and so everybody kent it wasna the rale Art. Folk got rich that quick in Gleska, and had sae much money to spend, that the photygraphers couldna keep up wi’ the’demand, and then the hand-pentin’ chaps began to open works in different pairts o’ the city. Ye’ll hardly gang into a hoose noo whaur ye’ll no’ see the guidman’s picture in ile, and it micht be bilin’ ile sometimes, judgin’ from the agony in his face.”
“My jove!” said Duffy, “is it sore to get done that wye?”
“Sore!” replied Erchie; “no, nor sore. At least, no’ that awfu’ sore. They wadna need to dae’t unless they liked. When maistly a’ the weel-aff Gleska folk had got their photygraphs done and then de’ed, the penters had to start the landscape brench o’ the business. Them’s landscapes a’ roon’ aboot”—and Erchie gave his arm a comprehensive sweep to suggest all the walls.
“They must be pretty smert chaps that does them,” said Duffy. “I wish I had gone in for the pentin’ mysel’; it’s cleaner nor the coals. Dae ye hae to serve your time?”
“No, nor time; ye can see for yersel’ that it’s jist a kind o’ knack like poetry—or waitin’. And the plant doesna cost much; a’ ye need to start wi’s paper, brushes, pent, and a saft hat.”
“A saft hat!”
“Ay; a saft hat’s the sure sign o’ an artist. I ken hunners o’ them; Gleska’s fair hotchin’ wi’ artists. If the Cairters’ Trip wasna abolished, ye wad see the artists’ tred union walkin’ oot wi’ the rest o’ them.”
The two friends went conscientiously round the rooms, Erchie expounding on the dimensions, frames, and literary merits of the pictures, Duffy a patient, humble student, sometime’s bewildered at the less obvious transcripts of nature and life pointed out to him.
“Is there much mair o’ this to see?” he asked at last, after having gone through the fourth gallery. “I’m gettin’ dizzy. Could we no’ hae something at the tea bar if we gied them a tip? They micht send oot for’t. Or we micht get a pass-oot check.”
“Mair to see!” exclaimed Erchie. “Ye’re awfu’ easy made dizzy! The like o’ you wad faur raither be oot skreichin’ yer heid aff at the fitba’ match at Parkheid, instead o’ improvin’ the mind here. Ye canna get onything at the tea place but jist tea, I’m tellin’ ye, and there’s nae pass-oot checks. They ken better nor to gie ye pass-oot checks; haulf o’ your kind wad never come back again if yince ye escaped.”
“My jove!” said Duffy, suddenly, “here’s a corker!” and he indicated a rather peculiar drawing with a lady artist’s name attached to it.
Erchie himself was staggered. “It’s ca’d ‘The Sleeper’ in the catalogue,” said he. “It’s a wumman, and her dozin’. The leddy that pented it wasna ower lavish wi’ her pent. That’s whit they ca’ New Art, Duffy; it jist shows ye whit weemen can dae if ye let them.”
“And dae ye tell me there’s weemen penters!” asked Duffy in astonishment.
“Of course there’s weemen penters.”
“And hoo dae they get up and doon lethers?” asked Duffy.
“I’m tellin’ ye Art pentin’s a brench by itsel’,” said Erchie. “The lady Art penters divna pent windows and rhones and hooses; they bash brass, and hack wud, and draw pictures.”
“And can they mak’ a livin’ at that?”
“Whiles. And whiles their paw helps.”
“My jove!” said Duffy, bewildered.
“We’ll gang on to the next room noo,” said Erchie.
“I wad raither come back some ither day,” said Duffy. “I’m enjoyin’ this fine, but I promised the wife I wad be hame early for my tea.” And together they hastily made an exit into Sauchie-hall Street.
“I wonder wha won the semi-final at Parkheid,” said Duffy. “We’ll awa’ doon the toon and see; whit’s the use o’ hurryin’ hame?”
One day I observed Erchie going off the pavement rather than walk under a ladder.
“And are you superstitious too?” I asked him, surprised at this unsuspected trait in a character so generally sensible.
“I don’t care whither ye ca’t supresteetion or no,” he replied, “but walkin’ under lethers is a gey chancy thing; and there’s mony a chancy thing, and I’m neither that young nor that weel aff that I can afford to be takin’ ony risks.”
“Dear me!” I said; “I wouldn’t be surprised to learn that you believed in ghosts.”
“Do I no’?” he answered. “And guid reason for’t! Did I no’ yince see yin? It was the time I had the rheumatic fever, when we were stayin’ in Garnethill. I was jist gettin’ better, and sittin’ up a wee while in the evenin’ to air the bed, and Jinnet was oot for a message. The nicht was wild and wet, and the win’ was daudin’ awa’ at the window like onything, and I was feelin’ gey eerie, and wearyin’ for the wife to come back. I was listenin’ for her fit on the stair, when the ootside door opens, and in a second there was a chap at the kitchen door.
“‘Come in if your feet’s clean,’ says I, pretty snappy. ‘Seein’ ye’ve made sae free wi’ the ae door ye needna mak’ ony ceremony wi’ this ane.’ I heard the hinges screechin’, but naebody cam’ in, and I looks roon’ frae where I was sittin’ wi’ a blanket roond me at the fire, and there was the ghost keekin’ in. He was a wee nyaf o’ a thing, wi’ a Paisley whisker, a face no bigger than a Geneva watch, a nickerbocker suit on, Rab Roy tartan tops to his gowfin’ stockings, and pot-bellied to the bargain. I kent fine he was a ghost at the first gae-aff.
“‘It’s you,’ says I. ‘Come in and gies yer crack till Jinnet comes. Losh, it’s no’ a nicht for stravaigin’.’
“He cam’ glidin’ in withoot makin’ ony soond at a’, and sat doon on a chair.
“‘Ye’re no’ feared,’ says he, tryin’ to gnash his teeth, and makin’ a puir job o’t, for they were maistly artifeecial.
“‘Feared?’ says I. ‘No’ me! I never did onybody ony hairm that wad mak’ it worth ony ghost’s while to meddle wi’ me. A flet fit but a warm hert.’
“‘We’ll see aboot that,’ says he, as cocky as onything. ‘I had a fine job findin’ oot where ye were. Fancy me gaun awa’ doon to Millport on a nicht like this to haunt ye, and findin’ that ye had flitted up here last term.’ And he begood to gnash his teeth again.
“‘Millport!’ says I. ‘Man! I was never near the place, and I’ve lived in this hoose for seventeen year, and brocht up a faimily in’t.’
“I never seen a ghost mair vexed than he was when I tellt him that. His jaw fell; he was nearly greetin’.
“‘Whit’s yer name?’ he asked.
“‘Erchie MacPherson, and I’m no’ ashamed o’t. Its no’ in ony grocers’ nor tylers’ books that I ken o’, and if I ever murdered ony weans or onything o’ that sort, it must hae been when I was sleepin’. I doot, my man, ye’re up the wrang close.’
“The ghost begood to swear. Oh my! such swearin’. I never listened to the bate o’t. There was fancy words in’t I never heard in a’ my life, and I’ve kent a wheen o’ cairters.
“‘That’s jist like them,’ says he. ‘They tellt me Millport; and efter I couldna find the man I was wantin’ at Millport, I was tellt it was here, No. 16 Buccleuch Street. Fancy me bungin’ awa’ through the air on a nicht like this! My nicker-bockers is fair stickin’ to my knees wi’ wet.’
“‘Peter,’ says I (of course I didna ken his richt name, but I thocht I wad be nice wi’ the chap see-in’ he had made such a mistake), ‘Peter,’ said I, ‘ye’re needin’ yer specs on. This is no’ No. 16, it’s number 18, and I think the man ye maun be lookin’ for is Jeckson, that canvasses for the sewin’-machines. He came here last term frae aboot Millport. If he’s done ony hairm to ony-body in his past life—murdered a wife, and buried her under the hearth-stane or ony daft-like thing o’ that sort,—I’m no’ wantin’ to hear onything aboot it, for he’s a guid enough neebour, has twa bonny wee weans, comes hame regular to his tea, and gangs to the kirk wi’ his wife. He’s been teetotal ever since he came here. Gie the chap a chance!’
“‘Jeckson!’ said the ghost, and whips oot a wee book. ‘That’s the very man!’ said he. ‘Man! is’t no’ aggravatin’? Here’s me skooshin’ up and doon the coast wi’ my thin flannels on lookin’ for him, and him toastin’ his taes at a fire in Buccleuch Street! Jist you wait. It shows ye the wye the books in oor place is kept. If the office was richt up-to-date, Jeckson wadna be flitted ten meenutes when his new address wad be marked doon. No wonder the Americans is batin’ us! Weel, it’s no’ my faut if I’m up the wrang close, and I’m no’ gaun to start the job the nicht. I’m far ower cauld.’
“There was an empty gless and a teaspoon on the dresser, for Jinnet had been giein’ me a drap toddy afore she gaed oot. The ghost ‘sat doon on a chair and looked at the gless.
“‘Could ye save a life?’ said he.
“‘Whit wad be the use o’ giein’ it to you, Peter?’ I asked him; ‘ye havena ony inside, seein’ ye’re a ghost.’
“Have I no’?’ says he. ‘Jist try me.’ So I pointed to the press, and he took oot the decanter as smert’s ye like and helped himsel’.
“He turned oot a rale nice chap in spite o’ his tred, and he gave me a’ the oots and ins o’t. ‘I’ve nae luck’ he said. ‘It’s my first job at the hauntin’, and I’ve made a kind o’ botch o’t, though it’s no’ my faut. I’m a probationer; jist on my trial, like yin o’ thae U.F. ministers. Maybe ye think it’s easy gettin’ a haunter’s job; but I’m tellin’ ye it’s no’ that easy, and when ye get it, it’s wark that tak’s it oot o’ ye. There’s mair gangs in for the job there than for the Ceevil Service here, and the jobs go to compeetition. “Ye hae’ to pass an examination, and ye hae nae chance o’ gettin’ yin if ye divna mak? mair nor ninety per cent o’ points. Mind ye, there’s mair than jist plain ghost-wark! It used to be, in the auld days, that a haunter wad be sent to dae onything,—to rattle chains, or gie ye the clammy hand, or be a blood-curdler.
Nooadays there’s half a dizzen different kinds o’ haunters. I’m a blood-curdler mysel’,’ and he gied a skreich that nearly broke a’ the delf on the dresser.
‘Nane o’ that!’ says I, no’ very weel pleased. ‘Ye’ll hae the neebours doon on us. Forbye, there’s naething patent aboot that sort o’ skreich. Duffy the coalman could dae better himsel’. That’s no’ the wye a dacent ghost should cairry on in ony hoose whaur he’s gettin’ a dram.’
“‘Excuse me,’ he says; ‘it’s the dram that’s ta’en my heid. Ye see, I’m no’ used to’t. It’s mony a day since I had yin.’
“‘Are they that strict yonder?’ I asked.
“‘Strict’s no’ the word for’t! If a blood-curdler on probation was kent to gang to his work wi’ the smell o’ drink aff him, he wad lose his job:’ and he helped himsel’ to anither dram.
“‘Weel, ye’re no’ blate ony wye,’ says I.
“‘Blate! Catch me,’ says he. ‘I wadna need to be blate at this tred, I’m tellin’ ye. Jist you think o’ the kind o’ customers we hae to dale wi’! They wad sooner see a tax-collector comin’ into their hooses than yin o’ us chaps. There’s some hooses ye hae to gang to work in where it’s easy. I ken a ghost that’s been fifteen years on the same job, and gettin’ fat on’t. He has the name o’ bein’ the best white-sheet ghost in the Depairt-men’, and he’s stationed in an auld castle up aboot the Hielan’s, a job he got because he had the Gaelic. He made it sae hot for the folk, walkin’ aboot their bedrooms at a’ ‘oors o’ the nicht, that naebody’ll stay in the place but himsel’ and an auld deaf and dumb housekeeper. There’s naething for him to dae, so he can lie in his bed a’ nicht and no’ bother himsel’ aboot onything. It’s a very different thing wi’ anither chap I ken—a chain-clanker in England. He has to drag ten yairds o’ heavy chain up and doon stairs every nicht; and it’s no easy job, I’m tellin’ ye, wi’ the folk the hoose belang to pappin’ things and shootin’ at whaur they think the soond comes frae. Oh ay! there’s a great run on the best jobs. My ain ambeetion is to be in the clammy-hand brench o’ the business in some quate wee place at the coast. I hae my eye on a likely thing at Rothesay. Of course the clammy hand’s no’ a very nice occupation for the winter, but this is a hoose that’s shut up in the winter, and I wad only hae to work it in the fine summer nichts.’
“‘Hoo dae ye dae the clammy hand, Peter?’ I asked him, and he jist winked.
“‘If I was tellin’ ye that,’ says he, ‘ye wad be as wise as mysel’. Never you mind, MacPherson; ask me nae questions and I’ll tell ye nae lees. Weel, as I was sayin’, I aye had a notion o’ a quate job at the coast. I couldna stand Gleska; there’s, such a rush aboot it, and sae mony stairs to sclim, and pianos aye playin’ next door. And the accent’s awfu’! Gie me a nice wee country hoose whaur somebody hanged himsel’, wi’ roses on the wa’, and dandelions in the front plot. But there’s plenty o’ us lookin’ efter jobs o’ that sort,—far ower mony; and it’s generally them wi’ influence that gets them at the hinder-end.’
“‘That’s whit everybody says aboot the situations here, Peter,’ says I. ‘If they’re nae use at their tred they talk a lot aboot influence. I’m thinkin’ ye wad soon get a job at the coast if ye were fit for’t.’
“He was the shortest-tempered ghost ever I seen. I had nae sooner said that than he gied anither skreich, and disappeared in a blue lowe wi’ an awfu’ smell o’ brimstone.
“‘Come oot o’ that!’ I says to him; ‘I can see the taps o’ yer gowfin’ stockings;’ and at that he gied a kind o’ shamed lauch and was sittin’ in the chair again, helpin’ himsel’ to anither dram.
“‘I’ll tell ye whit I’ll dae wi’ ye,’ said he. ‘I’ll no’ mind aboot Jeckson at a’, but I’ll hing aboot your hoose for a week or a fortnight, and they’ll never ken at the office. I canna think to gang into Jeckson’s hoose if he’s a teetotaler. Teetotalers is aye that—that—that teetotal. I wad never get sittin’ doon in Jeckson’s to a jovial gless like this.’
“‘Ye’re far ower jovial for me,’ says I. ‘See’s that decanter,’ and I took it frae him. ‘I’m awfu’ prood to see ye, but ye better be slidin’ afore her ladyship the wife comes in, or she’ll put the hems on ye. She canna stand ghosts.’
“‘Michty!’ said he, ‘have ye a wife?’
“‘The nicest wee wife in Gleska,’ said I. ‘And I wish to goodness she was hame, for I’m awfu’ tired.’
“‘Then I’m no’ playin’,’ said the ghost. ‘I’ll awa’ roon’ and gie Jeckson a cry afore he gangs to his bed.’
“He grabbed the decanter and emptied it into the tumbler, gied ae gulp, and anither gnash to his teeth, and went awa’ withoot sae much as ‘thenk ye.’
“Jinnet’s step was on the stair. Fine I kent it! Man, that’s the smertest wee wumman!
“‘There’s nae livin’ in this hoose wi’ ghosts,’ says I to her when she cam’ in, and she had some grapes for me.
“‘Is there no’, Erchie?’ she said, lookin’ at me, ‘my ain puir auld man!’
“‘Look at that decanter,’ says I; ‘the rascal emptied it.’
“‘Hoots! the decanter’s a’ richt,’ says she, takin’t frae the press; and as shair’s onything, there wasna a drap’ oot o’t!
“And she put me to my bed there and then.”