Annetiello — Amalia
Annetiello
'E' visto? (Pausa) Mm' 'e fatta fa n'ata bella figura!
Amalia
T' 'aggio fatta fa io? (Dopo una pausa) Tu saie ca vino nun ce ne sta e vaie mmitanno 'a gente?
Annetiello
'O pputive manná 'accattá!
Amalia
(ironica)
'E denare 'e ttiene?
Annetiello
Ll'aggia tené io?
Amalia
E che ll'aggia tené io?
Annetiello
(ironico, dondolandosi)
Pecché, nun 'e ttiene?... (Pausa) I' sa che saccio? Ca pe ll'ate... 'a muneta... esce... E pe mme... Basta, (si frega le mani) nun ne parlammo cchiù!...
Amalia
Tu fusse venuto c' 'a ntenzione 'e mme ncuitá?
Annetiello
I' t'aggio ditto nun ne parlammo cchiú!?...
Amalia
Ma che buo'?
Annetiello
Io che voglio? (Scattando, dando del pugno sulla tavola) Voglio chello che m'attocca, 'e' capito? Mme pare c' 'o patrone cca' dinto avarria essere io!
Amalia
(fredda)
E lloco te sbaglie!
Annetiello
Pecché, fusse tu?
Amalia
(c. s.)
E chi 'o ssape?
Annetiello
Ah neh? Haie raggione! Tu trase int' 'a casa mia...
Amalia
Ch' 'e mòbbele mieie, c' 'o lietto d' 'o mio, c' 'a biancaria mia, pavanno io 'o pesone e mettennote 'o riesto int' 'a sacca a te! Aize, vattenne! Nun accumminciammo 'a soleta letania!...
Annetiello
Aie raggione tu!
Amalia
'E' ntiso, vattenne!?
Annetiello
Ma ched'è, mo' mme ne cacce?
Amalia
(irritata, fremendo)
Vattenne!...
Annetiello
Me tuorne a di' vattenne?... 'Onn'Amá!... Ca io ve faccio assaggiá quacche brutto dispiacere!
Amalia
Tu?... Na vota mme putive ntussecá, ma mo' é fenuto 'o tiempo!
Annetiello
Se capisce! (Amaro e ironico) E c' 'o dice a fa? Io mo dint' a sta casa songo comme si fosse 'a mazza d' 'a scopa! Già, io sta casa 'a tengo pe lucanna e nient'ato!... 'A gente parla? E che mme ne mporta? Io faccio comme dice 'o si Rafele 'o ferracavallo: Lloro me iastemmeno e 'i ngrasso!... (traballa).
Amalia
(sprezzante)
Obbí ca staie a bbino?
Annetiello
Io stongo a bbino? Abbare cumme parle!...
Amalia
E batténne!
Annetiello
Mo' tuorne a di' vattenne?... Ma ched'è, c'aspiette a quaccheduno?
Amalia
(facendo per buttarglisi addosso)
Annetie'!...
Annetiello
(indietreggiando)
Io a stu tale e quale... nun 'o canosco... Certo è meglio... 'e me... (si sberretta) e io mme levo pure 'o cappiello... Pecché mo, all'urdemo all'urdemo... chesto m'attocca 'e fa... (volgendosi alla porta) Favurite... favurite!...
Amalia
(c. s.)
Vattenne!...
Annetiello
Ma... si stu tale e quale... è don Vito Amante... mme dispiace... ma... (ghignando) 'a cuscienza mm'apporta ca io v'aggio avvisá ca 'e denare ca le mettite int' 'a sacca... chillo nn'accatta robba 'e zuccaro p' 'a nnammurata...
Amalia
(livida)
Comme! E mm' 'o dice tu? Tu si' ca mme dice chesto?
Annetiello
(indietreggiando, la mano in petto)
Io faccio 'o duvere mio e ve dico ca Vito Amante se sposa a Cristina...
Amalia
(furibonda)
Iesce!... Iesce... Vattenne!
Annetiello
Hanno fatto pure 'e carte... E chesto costa a me... E se reverisce, e bonasera!
(Via)
Amalia
(cadendo a sedere presso al letto)
Uh, Madonna mia, nun mme fa ascí pazza! (Singhiozzando) Uh mamma mia, e che castico, che castico!...
Amalia — Nunziata — poi Cristina
Nunziata
(dalla via, in fretta)
'Onn'Amá!... 'Onn'Amá!... (La scuote) Embé?... E ch'è stato?... 'Onn'Amá!...
Amalia
(singhiozzando)
Io nun mme ne fido cchiú!...
Nunziata
'Onn'Amá, ccá sta Cristina...
Amalia
(levandosi di scatto e voltandosi)
Addo' sta?
Nunziata
Aspettate, embe'?... Vuie ll'avite pigliá c' 'o buono... Iammo... asciuttateve st'uocchie...
Amalia
Addo' sta?...
Nunziata
Sta ccá fora, 'o puntone... 'A pozzo chiammá?
Amalia
(meno vivamente)
Sí... chiammatela...
Nunziata
(alla porta, facendo cenno con la mano)
Psst!... Bella figlió!... Trasite!...
Cristina
(entrando, soffermata sulla soglia)
Bonasera. (Pausa. Donn'Amalia si volta lentamente e la guarda. A donn'Amalia) Che v'aggia servì?
Amalia
E trasite... (ironica) Che ve mettite paura?
Cristina
Me metto paura?... (entrando risoluta) 'E che?
Amalia
(siede accanto alla tavola)
Assettateve...
Nunziata
(a Cristina)
Assettateve... (siede anche lei).
Cristina
(rimasta impiedi)
Mme n'aggia i', scusate, aggio che fa. Si mm'avite dicere quacche cosa, aggiate pacienza, dicitemmello ampresso ca mme n'aggia i'...
Amalia
Nunziá, nun sia pe cumanno, chiudite nu poco chelli lastre. (Nunziata si leva, chiude la vetrata e rimane, tornando, impiedi) Bella figlió! (a Cristina, levandosi lentamente e posando la mano sulla tavola) Nunziata nun v'ha parlato 'e niente?
Cristina
Sissignore, m'ha ditto quacche cosa...
Amalia
(a Nunziata)
Comme ll'avite ditto?
Nunziata
Quacche cosa coppa coppa...
Amalia
(a Cristina)
E buie che ne dicite?
Cristina
A chi aggia risponnere, a vuie o a essa?
(Indica Nunziata che fa segno di non volerne sapere).
Amalia
Avite risponnere a me, bella mia. Chesto so' cose ca riguardano a me schittamente.
Cristina
(amara)
'O ccapisco. (Pausa. Nunziata si volta, guardando alla vetrata. Amalia, ritta presso alla tavola vi si appoggia con la mano. Cristina impiedi avanti a lei ha le mani nelle saccocce del grembiale).
Amalia
Dunque?
Cristina
Dunque che?
Amalia
Comme nce 'a mangiammo sta menesta?
Cristina
Comme vulite vuie.
Amalia
Diciteme na cosa, bella figlió, a mme m' hanno ditto ca vuie facite ammore cu don Vito 'o tintore...
Cristina
Sissignore.
Amalia
E ca isso... ve vo' pure spusà...
Cristina
(freddamente)
Gnorsí...
Amalia
(moderandosi a stento)
Embe', 'o vedite... Vuie mm'avarrisseve fa na finezza...
Cristina
(c. s.)
Iate dicenno...
Amalia
(Dopo aver dato uno sguardo alla porta)
'A finezza ca mm'avarrisseve fa... ll'avarrisseve dicere vuie stessa ca stu fatto nun po' essere...
Cristina
A chi mo? A don Vito?
Amalia
Eh, seh, a don Vito, a don Vito!...
Cristina
(fingendo meraviglia)
Neh?... E pecché?
Amalia
Pecché nu' po' essere, 'o vedite... Vuie 'o ssapite vuie stessa ca nu' po' essere... (a Nunziata) Nunziá, parlate pure vuie, dicitecello... Ve pare ca po' essere?...
Nunziata
(confusa)
'Onn'Amá, io che ve pozzo di'? Me pare... che saccio...
Cristina
Dicite, che ve pare?...
Nunziata
I' che saccio?... (a Cristina) Bella figlio', e parlate pure vuie! Vuie nun dicite niente?
Cristina
E c'aggia di'? Anfí a mo chello c'aggio ntiso aggio ntiso ca nu' po' essere. E va bene. Ma pecché nu' po' essere? Si nu' ve spiecate!...
Amalia
Sentite, bella figlio', ce stanno cierti cose ca s'avarriano rentennere senza ca uno se spiecasse tanto...
Cristina
(spallucciando)
Io so' nu poco ngnurante, che v'aggia di'?
Amalia
Embé quanno è chesto ca vuie site ngnurante, o vulite fa abbedé 'a ngnurante... io mo' v' 'o dico tale e quale... (Guarda alla porta) Sentite, bella figlio'... Vuie credo ca ve ne site addunata ca io parlo cu vuie e tremmo soccia soccia...
Cristina
(come ironicamente compassionandola)
Neh, e pecchè?
Amalia
(fremente)
E pecché chisto, pe tutte 'e riguarde, é nu brutto mumento pe me. Io ve vurria di' tutto chello ca mme passa p' 'a capa... ma... iarriemo troppo a luongo... È meglio ca mme faccio anema e curaggio e v' 'o dico una vota e bona... Vuie a Vito l'avite lassá... Pecché stu fatto nu' po' essere, avite capito? Nu po' essere!... Ce stanno tant'uommene ncopp'a terra e vuie ve site iuto sciglienno iusto a chillo! 'O ssapite ca chillo sta malato?... Sentite a me, scigliteve a n'ato. Vuie 'o truvate... Anze, vedite che ve dico, io sarria pure 'a femmena 'e v' 'o truvá. Sentite. Rispunnite a me. Vuie 'a ntenzione vosta qual'è? Chella 'e ve luvà 'a sta vita che state facenno, nun è overo?
Cristina
(fredda)
Gnorsì.
Amalia
Embé, io ve torno a ripetere ca ve voglio aiutà! Nuie facimme 'e modo e manera ca vuie ve luvate 'a dinto 'a disgrazia vosta e a Vito nun ce penzate cchiù... Che dicite?
Cristina
(cocciuta)
Voglio a Vito.
Amalia
(fremendo, ma moderandosi)
E sentite... Faciteme finí 'e dicere... Vuie site na bona figliola...
Cristina
(c. s.)
È buntà vosta.
Amalia
(c. s.)
Nonzignore, accussí è... Io me so' nfurmata e se so' truvate tutte quante una voce dicente... Vedite... si date audienzia a me, sora mia, io ve dico a buie ca doppo m'annummenate e dicite: Chella donna Amalia aveva ragione e io ll'aggia ringrazià c' 'a faccia pe terra... Sentite... Parlammece chiaro... Vuie tenite diebbete? Io v' 'e levo sotto 'o córpo. Vuie che vulite 'e carte a ll'ispettore subbeto subbeto? E io, cu 'e canuscenze meie, v' 'e faccio avé pure dimane matina. Ve servessero denare? Parlate. Ccá stongo io. Che v'aggia di' cchiù? (quasi commossa) Vulite sti rusette che porto 'e recchie? 'E vulite? E io v' 'e dongo... (fa l'atto di togliersele).
Cristina
(arrestandole la mano)
Lassate sta 'e rusette...
Amalia
E che bulite? Dicite!
Cristina
Voglio a Vito.
Nunziata
(giungendo le mani e dando un'occhiata alla porta)
Uh, Madonna mia, e che capa 'e calavrese neh! Meh, bella figlio'!...
Cristina
(ad Amalia che è rimasta muta, addossata alla tavola, gli occhi a terra, le mani in grembo)
Mm'avite di' nient'ato? Si nun mm'avite di' niente ato cchiú io mme ne vaco. Bonasera. (per uscire).
Nunziata
(ad Amalia)
Me', 'onn'Amá!... (a Cristina) Bella figlio', mme dispiace 'e vuie! I' che saccio, v'avarrisseve avuta fa capace!
Cristina
(fredda, impassibile)
Ma... 'e che? Vuie mme chiammate ccà dinto, mme vulite dà denare, mme vulite fa caccià 'e carte a ll'ispettore, mme vulite rialà 'e rusette... (sorride amaramente). Ma che pazziate o facite overo? Ma vuie 'o ssapite ca si mo tengo nu vascio pe durmí io pavo 'a mesata cu 'e denare mieie, c' 'o sango mio? Io mangio pane e pane pe nun cercá niente a nisciuno! Io nun aggio avuto niente 'a nisciuno, avite capito? Io nun voglio niente 'a nisciuno! Io voglio a Vito Amante.
Amalia
(furibonda, gridando)
Vuo' a Vito, vuo'?!... 'E tu te cride ca na femmena comme a te se po' pigliá a nu figlio 'e mamma comme a chillo?
Cristina
(ironica, fremendo)
Chesto nun ll'avarissive dicere vuie!
Amalia
(gridando)
Vito Amante nun se sposa a na mala femmena!
Nunziata
Zi'! Zi'!...
Cristina
Mo mm' 'o dicite n'ata vota?
Amalia
(per afferrarla, Nunziata la trattiene)
T' 'o dico n'ata vota, sí! E si vuo' fa buono, vattenne!
Cristina
(voltando le spalle)
Stateve bona...
Nunziata
(fermandola)
Aspettate!... (ad Amalia) Ma si facite accussí vuie nun ve cumbinate nè mo nè maie!
Amalia
Ma vuie 'o bedite chella cumme se vota? Ma 'o bedite ca mme vo' mettere cu 'e spalle nfaccia 'o muro? (a Cristina) Ma che mme vuó' fa fa nu guaio? Tu mme vulisse fa fa nu guaio? (Disperata, singhiozza) Uh, Madonna mia! Chesta mme vo' fa passà nu guaio overamente! (ricade a sedere).
Cristina
Nun avite appaura ca nun 'o passate 'o guaio!
Amalia
(levandosi e afferrandola)
Siente!...
Cristina
Parlate c' 'a vocca!... 'E mmane 'o pizzo loro!...
Amalia
Siente!... Te voglio di' n'ata cosa... Viene ccà (la conduce davanti al comò) Dimmello nnanze a Dio!... Tu 'o vuo' bene overamente? 'O vuo' bene overamente?
Cristina
Chesto ll'aggia sapé io.
Amalia
O vuo' bene cchiú 'e me? 'O canusce 'a quanno 'o canosco io? E tutto chello c'aggio fatto io pe isso tu l' 'e fatto, tu? 'A quanto tiempo 'o saie? Tu 'o saie a nu mese; e io 'o saccio 'a quatto anne! Tu pe isso ch' 'e fatto? Niente. E io pe causa soia nun so' cchiú guardata 'nfaccia d' 'a gente! Tu 'o saie mo ca sta buono e io 'o saccio 'a quanno steva malato, e mme mannava a chiammá, e io passavo 'e nuttate chiare chiare vicino 'o lietto suio. E mo' te ne viene tu e t' 'o vuo' spusá? Ma che l' 'e' truvato 'n terra? Ma che ssi' pazza o mme vuo' fa ascí pazza a me? (Lasciandole la mano e respingendola) No, tu nun t' 'o spuse! Siente a me ca nun t' 'o spuse! Io te scippo ll'uocchie 'a fronte, nfama, scellarata che si'!... (fa per avventarsi).
Nunziata
Gue'! Gue'! P'ammore 'e Dio! (Si frappone)
Cristina
Mo' mme pare ca ve n'abusate, avite capito?...
Amalia
(minacciosa)
Iesce, vattenne!...
Nunziata
Iatevenne, mo... Va, iatevenne...
Cristina
(ad Amalia)
'E tutto chesto ca mm'avite ditto io ve ne faccio cercà cunto, 'o ssapite!... (s'avvia alla porta).
Amalia
Tu a me?!... Grannissema...
Nunziata
(mettendole la mano sulla bocca)
Zitto, zitto!...
Amalia
(a Cristina, che fa per uscire)
E mannammillo a stu nnammurato tuio, ossá!...
Cristina
(sulla soglia della porta)
Va buono. Pe mo' avite raggione vuie... Bonasera!... Nunziá, bonasera... (esce).
Amalia
(disperata, convulsa, cadendo a sedere appiè del letto)
Uh, mamma mia! E io comme aggia fa? (Singhiozzando) Nunziá!... E io comme faccio?
Nunziata
Sia fatta a' vuluntà 'e Dio!
Amalia
Avite visto, neh, Nunziá?...
Nunziata
C' 'o buono no e c' 'o peggio manco! 'I che capa tosta!
Amalia
E mo' comme aggia fa? Dicite vuie!
Nunziata
'Onn'Amalia mia, e io che ve pozzo di'?... (leggero tuono in lontananza. Annotta). Ched'è, vulesse vení pure a chiovere? (S'accosta alla porta e guarda fuori) Mamma, ma', e comme s'è fatto niro 'o tiempo! E io che tengo 'e llenzola fora 'a loggia!... 'Onn'Amá, ve lasso 'a bona nuttata...
Amalia
(si leva)
No, Nunziá, nun ve ne iate!...
Nunziata
'Onn'Amalia mia, tengo 'e lenzola for'a loggia. 'E voglio trasí primma ca vene a chiovere... (si accosta alla porta e torna a guardare) Se sta apparicchianno na brutta trubbea! Abbasta ca dimane a sera nun ce ntussecammo Piererotta!... (Tornando subito) Uh, 'onn'Amá!... Mme pare ca sta venenno 'on Vito 'a chesta parte!...
Amalia
(che, fra tanto, accende un lume)
Chi?... Vito?...
Nunziata
(guardando fuori)
Isso è, isso è!... Sta parlanno cu Cristina, a 'o puntone... Facitemmenne i' a me, aggiate pacienza!...
Amalia
Aspettate!...
Nunziata
No, no, mme ne vaco, mme ne vaco... Bonasera... bonasera... (Si gitta lo scialle in capo e fa per scappare. Poi torna). Mo mme scurdavo 'o raso in lana!... (Afferra il pacchetto che aveva lasciato sulla tavola e scappa) Bonasera!... Felice notte...
Amalia
(Corre allo specchio e vi si rimira. Si asciuga gli occhi in fretta. Quindi continua a far mostra di pettinarsi. Si sente di fuori un colpetto di tosse, e un «buonasera» scambiato fra due uomini. Vito compare sulla soglia).
Amalia — Vito — poi Cristina
Vito
(Entra, d'un subito, brusco, accigliato. A mezzo della stanza, s'arresta. Si guarda intorno, aspetta quasi che Amalia si volti e gli parli. Ella è impiedi davanti al comò e finge di spolverarlo. Si rivolta, a un momento, con aria tranquilla e seguitando a spolverare):
Amalia
Gué?...
Vito
(avanza e le si accosta)
'Onn'Amà, ccà è stata Cristina.
Amalia
(gli si volta di faccia. Sorride, parla lentamente)
'A capuana?... Sissignore.
Vito
(impaziente)
'A capuana, 'a napulitana... comme vulite vuie... (Amalia continua a sorridere) Be'!...
Amalia
Be'?...
Vito
(deciso)
Mm' avarrisseve fa na finezza... 'onn'Amá!...
Amalia
Iate dicenno... (Lascia lo straccio sul comò e viene avanti).
Vito
Avarrisseve lassà cuieta a chella!
Amalia
Nun avarria a che penzá.
Vito
Be'!... Quanto cchiù mm' aiutate a di'! Giacché cierte cose nun ve mportano... faciteme 'a finezza... lassate sta 'a gente ca cu vuie nun ce ave che ce spartere!
Amalia
(È presso alla tavola. Siede accosto ad essa. Leva la testa e guarda Vito, ironica, dominandosi)
Ma a vuie chi v' 'o fa fa?... Vuie pecché ve nfucate, neh, 'on Vi'?...
Vito
(impiedi, vicino a lei)
Io nun mme nfoco. Io ve dico sulamente lassate 'a i'!
Amalia
(lenta)
È benuta a ricorrere?
Vito
O è benuta o nun è benuta, chisti so' fatte ca nun v'apparteneno.
Amalia
(dopo un silenzio, guardandolo)
I' comme state ammulato!... 'A verità... nun mm' 'o credevo...
Vito
Embè...
Amalia
(ha cavato la pezzuola, la tormenta, la gualcisce, nervosa)
È giusto... Comme se dice?... 'O munno è na rutella. Ogge una... (lo guarda fiso).
Vito
(la guarda fiso)
E dimane n'ata.
Amalia
(accosta alla bocca la pezzuola e, lievemente, la morde)
È giusto... Assettateve...
Vito
Grazie. Mine n'aggia í...
Amalia
E ghiate, ja'...
Vito
Sì, mme ne vaco... Ma... v'aggia dà na prighiera...
Amalia
(sorridendo)
E so' ddoie.
Vito
(si china, le mani piantate sulla tavola, tamburellandovi con le dita. Parla quasi sottovoce)
Sentite... 'onn'Amá...
Amalia
(sottovoce, senza guardarlo)
Dicite...
Vito
(c. s.)
Io cu mammema mme stongo appiccecanno quasi ogne ghiuorno... (Amalia fa per interromperlo, egli stende la mano come per arrestare la parola di lei) Aspettate... Dico accussí... Inzomma, vuie nun avarrisseve attezzà tanto 'o ffuoco, 'onn'Amá!... (diventa quasi minaccioso) Si no...
Amalia
(leva la testa e lo affisa. Mormora, a denti stretti, pianissimo)
Si no?...
Vito
(si rizza, lentamente)
Dico accussí... Vuie... si nun ce venarrisseve cchiú, 'a casa mia... meglio farrisseve...
Amalia
(si leva, di scatto. Batte con la palma della destra sulla tavola)
Ah!... Ca... (Vito indietreggia) Embé... Tu te n'abbuse ca io sto ccà dinto, e stonco sola!... Tu... nnanz' a n'ommo... nun parlarrisse accussí!
Vito
(offeso, fremente)
'Onn'Amá!...
Amalia
Va llà, ca io te saccio!... (gli si accosta anche più) Tu sì carogna!
Vito
Se'?... (livido, sprezzante) E 'o marito vuosto?...
Amalia
(faccia a faccia con lui, afferrandolo quasi pel petto, sottovoce)
E mmaritemo é cchiú carogna 'e te!
Vito
(liberandosi dalla stretta, cercando di contenersi)
Mme dispiace ca state int'a casa vosta... capite... Si no, sta parola v' 'a facesse... (si liscia il mento, nervoso) Basta... So' parole 'e femmene. E se teneno pe serenata... (fa per uscire) Bonasera...
Amalia
(gli sbarra il passo)
Addo' vaie?...
Vito
Leváteve!... Nun facimmo rirere 'a gente... Chi passa va trova che se crede...
Amalia
No!... Tu nun iesce! (corre alla vetrata e la rinserra. Borbotta, lontanamente, un tuono).
Vito
(avanzando verso la vetrata)
Facitemmenn' 'i'!... Facitemmenn' 'i' ca è meglio...
Amalia
No! No! Nun iesce! No!... (la stanza s' è abbuiata. Vito si volta attorno, smania, si torce le mani) È nu mese 'a ch' 'e' fatto stu voto... e io te vaco truvanno, e nun te pozzo maie truvà sulo... nun te pozzo maie parlà comme voglio i'!... Mo è benuto 'o mumento!
Vito
(l'affronta: cerca di scostarla dalla vetrata)
Famme ascí!... Mannaggia!...
Amalia
(lo respinge, tra tenera e disperata)
No!... Nun iesce!... Addo' vuo' i'?... Ma che te sta aspettanno?... Te sta aspettanno, ovè, chella bona femmena?... (s'arretra, si china a guardare per la vetrata. Il tuono romoreggia ancora) 'A i' llanno, 'a vi'!... Sta 'o puntone... 'O pizzo suio...
Vito
(afferrandola)
Lèvete!...
Amalia
(si libera e afferra lui e lo respinge, convulsa)
Ma che l' 'e' fatto a ffa, stu voto?... Pecche ll' 'e' fatto?...
Vito
Pecché nun mme ne fido cchiú! Pecché sta catena mme pesa! Ll'aggio fatto pe disperazione!... Ma che buo', che buo'?!... Lasseme! Io so' nu sfurtunato! So' n'ommo perzo!... Ma tu ce pienze a chello c'avimmo fatto? A chello che stammo facenno?! (si copre la faccia con le mani. Con la voce sorda): È peccato!... È peccato!... 'O Pate Eterno s'è stracquato!...
Amalia
Embè... Si s'è stracquato ce zeffunnasse a tutte e dduie!... È meglio 'a morte! Cientemila vote!...
Vito
(inorridito)
Ma che dice?... Io aggio fatto nu voto...
Amalia
Assassino! Assassino!... Tu vaie facenno vute 'e leva' femmene d' 'o peccato e te scuorde 'e na femmena ca sta int' 'o peccato pe te!...
Vito
Ah, Dio! Dio!...
Amalia
Io mme steva cuieta, 'a casa mia! Tu si' stato ca me si' venuta a tenta'! Tu, tu, tu!... Tu t' 'e' pigliato 'o mmeglio 'e me! Tu si' stato!... E mo mme vuo' lassa'?!...
Vito
Ah, che catena! Che catena!...
Amalia
E chi è c' 'a porta sta catena?... Tu si', ca mm' 'e' levato ll'onore 'a faccia, ca mm' 'e' levata 'a pace d' 'a casa mia, ca mm' 'e' fatto scurdà a mmaritemo, ca mm' 'e' fatto fa cchiú nemice ca nun tengo capille ncapo!.,. Tu! Tu!... Tu mm' 'e' fatto sputà n' faccia 'a maritemo!... Tu mm' 'e' fatto addeventà l'urdema femmena d' 'o munno!... Tu mm' 'e' voluta?... E mo', tieneme!...
Vito
Ma che buo'?... Che buo'?... Si aggio fatto 'o voto ll'aggio fatto pecchè me so' visto perzo!... Io sto malato!... Io nun so' cchiù chillo 'e primma!... Io mme so' visto 'a morte cu ll'uocchie!... Aggio visto... 'o Giesù Cristo nnanze a me... (ansimando, commosso, quasi singhiozzando) Mme pareva... ca mme vulesse di': Píentete!... E 'a primma parola... 'a primma parola c'aggio ditto... Aggio ditto: Ah, Giesù Cristo mio!... Famme sanà... E io... te faccio 'o voto 'e leva'...
Amalia
(gli si getta addosso, gli tura la bocca, urla)
No! No!... Nun 'o ddi' cchiù!... Maie!... Maie!...
(La pioggia comincia a cadere e scroscia di fuori)
Vito
Famme asci'!...
Amalia
No!... (lo afferra, lo respinge, lo carezza, lo minaccia) Tu stu voto l' 'e' a spezzà!...
Vito
È sacrileggio!...
(Un lampo vivissimo. Di fuori la viuzza s'illumina. Dietro la vetrata appare, ritta, Cristina, con lo scialle sul capo. Ella spia per i vetri. La pioggia scroscia).
Vito
(con la mano tesa alla vetrata)
'A i' llá!...
Cristina
(scotendo la vetrata)
Vito!... Vito Amante!...
Vito
(balbettando)
Cristina!...
Amalia
(feroce, lo respinge)
Nun te movere!...
Vito
Làsseme!... (Vuol giungere alla vetrata. Amalia lo afferra e quasi lo atterra. Egli cade a sedere, ansimando, vinto. Amalia si rizza, si volta alla vetrata, nasconde con la sua la figura di Vito. La pioggia continua a scrosciare. Un silenzio. Amalia non leva gli occhi dalla vetrata. Dietro di lei Vito avanza il capo e ancor egli guarda, sbarrando gli occhi. Un lampo).
Cristina
Vito! Vito!...
Amalia
Nun guardà'!...
Vito
(debolmente)
No...
Amalia
Giurame ca nun t' 'a spuse!...
Vito
(c. s.)
No... Nun... m' 'a sposo...
Amalia
C' 'a lasse!...
Vito
(c. s.)
Sí...
Amalia
Giura!...
Vito
(sfinito, con un filo di voce)
Sí... giuro...
Cristina
Vito! Vito Amante!...
Amalia
(Corre alla vetrata. Ne chiude le imposte, sbattendole. Uno scroscio di pioggia. La scena si rabbuia anche più. Vito s' è quasi levato. Vorrebbe avanzare. Amalia gli è addosso: lo afferra, lo stringe, se gli avvinghia, gli soffia sul volto:) No!... No!... No!...
Vito
(balbetta)
Ah, che catena!... Che catena!.
Cade subito la tela.
DECORAZIONE