IV. quat. PETROSINELLA(Variante raccolta in Avellino in P. U.)
Nci steva 'na vota 'na femmena prena, chi steva sempe malata. 'No juorno chiammavo 'o miedico; e dicivo, ca voleva 'na cura pe' stà' bona. 'O miedico risponnivo, ca nci voleva 'na menesta de petrosini ogni ghiuorno, e accossì ssi poteva sanà'. Accanto 'a casa 'e 'sta femmena nci steva 'o giardino 'e l'Uorco, e dinto nci stevono tanta belli petrosini. Essa penzavo, ca chilli erano buoni, e sempe ss' 'e ghieva a coglie'. E 'no juorno, e dui; finalmente l' Uorco sse n' addonavo, e dicivo:—«Io haggio vedè' chi è, ca ssi vene a coglie' tutti i petrosini mmii».—Pigliavo 'no gallo; e'o mettivo a guardia d' 'o giardino; e li dicivo:—«Statti lloco; quanno vidi quaccheduno, chi ssi cogli i petrosini, tu canta, ca ia subbito vengo».—'Sta femmena 'o sapivo, e, quanno fu 'a notte, ssi portavo 'no poco 'e granodinio; e, quanno 'o gallo accominciavo a cantà', essa li menavo 'o granodinio, e chillo ss' 'o mangiavo e ssi stivo zitto. 'A matina, l' Uorco trovavo mancante 'n' auta vota i petrosini; e dicio:—«Mo' nci metto a guardia 'na vacca e vedimo chi è».—'Sta femmena 'a notte li portavo 'no poco d'erba. 'A vacca ss' 'o mangiavo; e non allucavo. 'A notte appriesso, l'Uorco ncimettivo 'no ciuccio; e li dicivo:—«Statti attiento! quanno vene quacchedune, tu arraglia forte, ca io ti sento e vengo».—'A femmena, come a lo solito, sapeva tutto; e ssi portavo 'no poco de fieno. Quanno 'o ciuccio 'a vedivo, accominciavo a raglià'; essa pigliavo 'o fieno e l'appilavo 'a vocca. Chillo povero Uorco steva disperato, pecchè vedeva ca no' nci poteva arrivà'; e dicivo:—«Io haggio mettuto a guardia a lo giardino 'o gallo, 'a vacca, e 'o ciuccio; e nisciuno mm' hâ saputo vedè' chi era. Mo' mmi nci metto io; e vedimo, si 'a scappa».—Scavavo 'no fuosso; e ssi nci mettivo dinto, ca no' nzi vedeva nienti. Sulo 'na 'recchia 'a rimanivo 'a fore, pe' sentì' quanno veneva gente. Quanno fu 'a notte, 'a femmena jivo, e no' vedivo nisciuno a guardia. Ssi mettivo à coglie'; e ssi coglivo tutti i petrosini. Quanno steva pe' sse ne ì', ssi sentivo move 'na cosa sotta i piedi; calavo 'a lucerna, chi teneva 'mmano; e dicivo:—«Che bello fungo, mm' 'o voglio propio coglie'».—Pigliavo 'o cortiello e ss' 'o steva coglienno. L' Uorco subbito ss'azavo e dicivo:—«Birbante, mariola; tu si' stata; mo' t'haggio accide'».—Ma po' ss' addonavo, ca era prena, e dicivo:—«Io te ne manno senza fa' nienti, c' 'o patto, ca, quanno sgravi, 'sta figlia 'a voglio io; e l' hâ mette' nomePetrosinella».—'A femmena li divo 'a parola, ca, quanno era fatta grossecella, nce la mannava. 'Ncapo 'e tiempo 'sta femmena sgravavo, e fece na bella piccirella e li mettivo nome Petrosinella. 'O marito l' addommannavo:—«Pecchè li metti 'sto brutto nome?»—E essa li contavo'o fatto, e li dicivo, ca quanno era cchiù grossa, sse l' avev'a piglià' l'Uorco. 'Sta figlia ssi fece grossa, e ghieva a scola; e l'Uorco, quanno 'a vedeva, li diceva sempe:—«Dì a màmmeta, si mmi vo dà' chella cosa».—'A figlia 'o diceva 'â mamma; e 'na vota, e doje; finalmente 'a mamma dicivo:—«Dincello, ca quanno 'a trova, che ss' 'a piglia».—'Sta figlia 'a matina passavo 'n'auta vota, e l'Uorco li dicivo:—«Mm' 'a pozzo piglià'? che t'ha ditto mammeta?»—«Ha ditto, che v' 'a pigliati».—L'Uorco scennivo, e ss' 'a pigliavo. E li voleva tanto bene; e, pe' paura ca ss' 'a'rrubbavano, no' la faceva ascì' mai. L' aveva dato tre segge: una d'oro, 'n' auta d' argiento e 'n' auta de brillanti; e li dicivo:—«Quanno stai allegra, t' assitti 'ncoppa a chella 'e brillanti; quanno stai malata, 'ncoppa a chella d' oro; e quanno stai afflitta, 'ncoppa a chella d' argiento; e accossì io subbito mme n'addono».—E essa accossì faceva. 'No juorno l'Uorco escivo; e, quanno ssi ritiravo come 'ô solito, Petrosinella li calava 'e trecce e isso sse ne saglieva p' 'a finesta. 'Sta vota chiama:—«Petrosinella, Petrosinella, cala le trecce, ca voglio saglì'!»—e nisciuno risponneva. Isso chiano chiano saglie 'ncoppa, e no' trova nisciuno, e 'a casa tutta sfrattata. Ss' affacciavo 'â finesta; e vedivo Petrosinella, chi se ne fojeva c' 'o figlio d' 'o Re. Accominciavo a chiamà'; e chiama e chiama e nisciuno ssi votava. L'Uorco, disperato, ssi menavo 'a coppa abbascio e morivo. Cucurucù, no' nce n'è cchiù.