VI bis. VILLA(Variante, anch'essa di Pomigliano d'Arco)
'Na vota nce steva 'nu Re; e facette 'o giuramento, isso cu' tutte 'e cavaliere ssuie, ca nisciune 'e loro ss'aveva 'nzurà '. 'Nu cavaliere 'e chisto, 'nu juorno, ammente passiave, verette 'na giovene 'ngoppa a 'nu barcone, che le piacette tanto. Receva 'ntra isso:—«Mo', se mm' 'a piglio, manco 'ô giuramento.»—Ma chella l' aveva ferite 'o core; e 'o cavaliere nu 'nze ferave cchiù e le mannave 'a 'mmasciate. Chella le recette, ca sì. E isso ss' 'a spusave annascuse 'e tutte; e pe' cierto tiempe sse vulevane tantu bene; nun 'a faceva abberè' a nisciune, e le mettette pure a cammariera. Roppe cierto tiempo, vene sapenne 'o Re, ca chillo cavaliere ss' iera 'nzurate. Sse chiammave 'e cavaliere e le recette:—«Comme avimmo 'a fa', pe' berè' 'sta spose, ca sse rice, ch'è tanta bella?»—«Maistà , nu' nc' è aute mezzo, ca chiammà ' 'a serva, prummetterle 'na summa 'e renare, e iessa ha da penzà ' 'ô more e manere pe' nce 'a fà ' verè'».—«E pure recite buone»,—recette 'o Re:—«Parlate c' 'a serva; e berite, che cose putite fà '.»—Sse chiammavene 'a serva e decettere:—«Vire, ca sua Maistà vo' verè' 'a signurina toia, annascuse r' 'o marito. Trove tu,comm' avimme 'a fà '».—«Signurine mmio, cheste nun po' essere; ì' songh' accise r' 'ô patrone».—«No, tu haie 'a verè' 'e nce fa' 'stu piacere. Nuie te ramme 'na bona summa 'e renare».—Chella recette:—«Embè', sê cu bulite fà '? Venite rimane 'e sera a doie ore 'e notte; ì' v' 'a facce truvà ' addurmute; le ronghe 'nu poche r'adduobbie, ammene chella nu' nze scete».—Ss' abbaccaiene accussì c' 'a serva; e, quanno fuie l' auta sera, 'o Re sse mettette 'ncarrozza, 'nziemme cu' 'nu cavaliere, e ghiette llà . 'A serva le facette truvà ' 'ô palazze apierte; e trasettere adderitte rinto c' 'a carrozza. 'A signurine aveve avute adduobbie e durmeve. 'O Re sagliette 'ngoppa e ghiette vicino 'ô lietto. Sse luvave 'nu vuanto r' 'a mane pe' 'a 'ccarezzà ' 'nu poche; e 'o mettette 'ngoppa 'o liette. 'A tenette mente bona bona; sse stette 'nu poche; e po' sse ne iette, e sse scurdave 'e sse purtà ' 'o vuanto. Quanno venette 'o marito 'a sera, 'a verette rinto 'ô liette e spiave 'â serva,pecchè ss' era cuccate?Chesta respunnette, ca teneva relore 'e cape: e 'o cavaliere s'abbecenave 'â mugliera pe' 'a verè'. Truvave 'ô vuanto r' 'o Re 'ngoppa 'ô liette, 'o canuscette, e nu' decette nisciuna parola. Quanno fuie 'a matine, 'a mugliera iette pe' le fà ' 'e ciremonie; e chillo le vutave 'a faccia e n' 'a respunneve. Chella puverelle sse mettette a chiagnere; e chiagneva sempe. Jette a sfugà ' c' 'a serva ssoia e le recette,ca 'o cavaliere ssuie l' aveva vutate 'a faccia. Respunnette a serva:—«Signurì', nun ve ne 'ncaricate; chillo fa accussì e po' le passe».—Passaie 'nu juorno e 'n aute:e chillo manco 'a teneva mente e nu' respunneve 'ê ciremonie, ca chella le faceve. Jette 'a signore a chiagnere 'n'ata vota addò 'a serva. Rice:—«Chillo nu' mme vuarde, ì' comme hagge 'a fà '?»—«Sê che bulite fà '? quanno chillo sse retire, e buie 'o iate a scuntà ' e nu' ve responne, vuie recite accussì:Villa era, e Villa sò'; | era amata e mo' nu' nce so'; | non mi ama il mio patrone, | io non so per quala ragione».—Chella accussì facette; quanno chillo sse riterava, l'ascette 'nnanze e le recette comme l' aveva cunzigliata 'a serva. Chillo nu' nze ne 'ncarricava e pure le vutava 'a faccia; e 'a puverelle chiagneva sempe. 'O benette sapenne 'o Re; sse chiammave 'e Cavaliere e decette:—«Comm' avimme 'a fà ', pe' nun fà ' patì' cchiù chella povera giovene?»—«Sê, che bulite fà ', Maistà ? facite 'na tavule a tutte 'e cavaliere; e chille, che so' 'nzurate, hanne 'a purtà ' 'e mugliere. E accussì 'e facimme fà ' pace.»—Ascette l' ordine; e chillu cavaliere nun puteva fà ' ammene 'e purtà ' 'a mugliera. Jette addò 'a serva e le cummannave, ch' avesse ritto 'â signora,ca sse fosse vestute, pecchè avevene 'a ì' a mangià ' addò 'ô Re. Avubberette chella, sse vestette e ghiette 'nziemme c' 'o marito, senza tenerse mente. Ma primme 'e ì', iette vicino 'â serva e decette:—«I' mo' comme hagge 'a fà '? chillo nun mme tene mente; tutte chilli signure sse n' addonene; e po' comme rìcene?»—E chiagneva p' 'o dispiacere.—«Sê, che bulite fà '?»—recette 'a serva.—«Vuie mettiteve a tavule e faciteve verè' 'mbestata 'mbestata. Chille v'hanne 'a ricere, vecine a buie:Nèh, pecchè state cusì malinconica?Vuie responnite e decite:Villa era, e Villa so', | era amata e mo' nu' nce so'; | non mi ama il mio patrone, | io non so per quala ragione; e berite, che ne succere».—Accussì fuie: iessa sse facette verè' 'mbestata 'mbestata; chille le spiavenepecchè steva culerica, e iessa respunnette comme l' aveva ritto 'a serva:—«Villa era e Villa so' | era amata e mo' nu' nce so; | non mi ama il mio patrone | io non so per quala ragione».—Respunnette subeto 'o marito:—«Per la guancia del leone | non ti ama il tuo padrone».—Respunnette 'o Re:—«Aggiate pacienzie, 'sta povera figliole nu' ne canosce niente; mo' ve conte ì' 'o fatte comme va'».—Lo cuntave; e accussì 'e facette fà ' pace, e sse ne jettero felice e cuntente.